Aizawl: ZPM Party Leader Lalduhoma chuan, "ZPM hi kan inlungrual a, sawrkar-na siam tur hian kan inringtawk a, kan inpeih bawk a ni," a ti.

Lalduhoma hian ni 29.3.2022 - 1.4.2022 chhung khan Chalfilh Constituency a tlawh kual a; he hunah hian khaw hrang hrangah public meeting neiin Mizoram politics-ah harh tharna a thlen mek thu a sawi a. "Mipuiten Congress ni lo MNF ni lo sawrkar din an duh tawh a, ZPM Party-ah mipui ten rinna an nghah tawh avangin ZPM chuan mipuite a ti beidawng ve thiang lova, ZPM hi mipui tana din a ni a, a chhungah hian Zofa zawng zawng kan leng vek a ni," a ti.  Duhoma chuan Sem Policy-in kan ram leh mipuite rilru a tihchhiat thu sawiin, “Mipuite hi thuawih tak kan ni, sawrkarin 'ching rawh u' a tih chu thuawih takin kan ching mai a; amaherawhchu, sawrkarin a hralhna a ngaihtuah leh si loh avangin mipuite beidawnna khurah min hnuk lut ta thin a ni," a ti a. "Kan ramah hian rorelna fel leh dik hi kan din a ngai tawh a, ram hruaitu eiru lo, ram leh hnam hmangaih leh a ngaihna hria kan mamawh tawh a ni," a ti bawk. 

ZPM Leader hi General Secretary, Organisation Central changtu Er. Vanlalneiha leh headquarters hruaitu engemawzatin an tawiawm a. An khaw tlawh hrang hrangah hian ZPM hruaituten tha takin an lo dawngsawng zel a, an party ah mi 496 a lawmlut niin ZPM chuan thuchhuah an siam.