Aizawl November 21, 2022 : ZPM chhung inkhawma thusawitu an Vice President Dr. Kenneth Chawngliana chuan, ZPM-in thil pathum - An goal, an policy leh an leader te chu an thil zawrh a nih thu leh ZPM zara sawrkar tum an awm nia sawiin, a mala mipui sawrkar tha tak siam chu an tum ber a nih thu a sawi bawk. 

Dr. Kenneth Chawngliana chuan, “Kan goal chu kalphung thar hmanga mipui sawrkar siam a ni. Kalphung thar ziarang pawimawh tak tak te chu; party hi mi pakhata thuneihna burbun lova thuneihna intawm (collective leadership) hmanga kaihhruai te, mi pakhat term hnih bak Chief Minister an ni thei lovang tih te, CM-in works department a khawih lovang tih te, Val Upa Council (VUC) uapna hnuaia party leh sawrkar kalpui te, dan rorelna (rule of law) tundin te, langtlang (transparent) sawrkar siam te a ni. Eng dan berin nge kan kal tih pawh hriatthiam har khawpa kan ram hmaibal hi tihfai kan tum dawn a, a pui berah chuan mi rethei zawk ten hma nan sawn theihna turin ZPM chuan hma a la dawn a ni,” a ti a. 

A mala sawrkar siam an tum thu sawiin, “Tunlai hian Mizorama sawrkar siam tum lova campaign an awm a, tu te nge an nih kan hria a, heng mite hi ZPM zara sawrkara tel tum an ni tih mipuiten hria se kan duh a, ZPM hian a malin mipui sawrkar tha tak siam a tum a ni,” a ti.

ZPM Vice President chuan, “Kan policy – SDRP kan tlangzarh tawh a; hetah hian ZPM chuan engtiangin nge ram kaihhruai a tum a, ram hmasawnna kuangfung duan a tum tih zawng zawng a awm vek a ni. Zoram mipui zawng zawngte lo zirchiang a, ZPM policy hi belhfakawm a nih dan leh he policy hi ZPM sawrkar tehfunga hmang turin ka sawm che u a ni,” a ti a. “Goal leh policy eng anga tha nei mah ila, hruaitu tha kan neih loh chuan kan tum ram kan thleng thei lovang. Mi bik, chawimawi hlawh, mahni tuma chiang, eiru lo bera thlan chhuah, sawrkar kalhmang hria leh assembly rorel thiam Leader, Pu Lalduhoma kan nei hi kan vannei hle a ni,” a ti. 

Policy an neih leh an hruaitute chungchang pawh sawi langin, “Israel ram chu Mizoram aia te daih, thlaler ram a ni; mahse goal an nei a, policy tha an nei a, hruaitu tha an nei a; vawiina an dinhmun chu awhawm tak a ni. Chuvangin, ZPM hian kan goal, kan policy leh kan leader te hmangin Zoram thar kan siam ngei ang tih ringin, taima takin theihtawpin i thawk ang u,” a ti bawk.