Aizawl: ZPM chuan Chief Minister Relief Fund for Covid 19 sum hmanna puanzar an duh tih an sawi.

Nimina thuchhuah an siamah ZPM chuan July ni 23,2020 thlenga CM Relief Fund for COVID-19 atana sum lut zawng zawng chu HDFC Bank Account-a pung Rs. 2,20,784/- chhiar telin vbc. 20.26 Crores a tling tawh a. COVID-19 hrileng avanga tanpui ngaite tanpuina leh bungrua mamawh leina atan Rs. 12,43,37,049/- hman tawh niin, vbc 7.8 crores a la bang niin an sawi a. CM Relief fund a sum hman chu puanzar a ni tawk lo nia sawiin, "Kan sawrkar hian Covid-19 do letna pual bik atan hian sum a dawng tam tawh hle a, a hmanna pawh a tam tawh hle bawk a. Nimahsela hetih rual hian a hmanna te hi mipuiin kan hriat ve zel tur a nih laiin sawrkar erawh chuan mipui beisei angin a puangzar ta chiah lo hi a pawi hle a. Sum renchem chhuanlama chanchinbumite hreka advertisement an tih hniam vak laiin chanchinbu aia darh zau lo zawk pamphlet chhut atan Rs. 1,053,000/- lai sen anga tarlan a ni hi copy engzatnge siam a nih a, khawi press ah nge chhut a nih a, khawiahnge semdarh a nih pawh tarlan a ni leh si lo hi ZPM chuan mak a ti hle a ni," an ti.

ZPM chuan mi inphal ten mimal leh pawl anga Covid do letna atan sum vbc. 20 chuang lai an chhunglut chu thil lawmawm tak a ni tiin sum leh pai hlantute ngei pawh hian sum hmanna te hi hre lova a ral ngawt ai chuan hre thei zel sela an lawm zawk ngeiin a rinawm a. SEDP atana sum dah thahnem tham tak khawih chet loh a la ni leh zel te hi sawifiah turin ZPM chuan sawrkar a phut a ni, an ti bawk.