Aizawl: Zoram Peoples Movement (ZPM) President Lalliansawta chuan hmanhmawh taka Local Council leh Village Council inthlan buatsaih a ni chu an party in mak an tih thu a sawi.

Nimin khan an party office ah chanchinbumite kawmin ZPM President Lalliansawta chuan VC leh LC inthlan turah inbuatsaihna ni 5 chiah a awm nia sawiin, "Heti chuk chuka VC/LC thlan buatsaih hi a awm ngai lo a, sawrkar hi mipuiin an hre chiang telh telh a, hriat chian lehzual hma an chuh ni berin kan hria," a ti.

Inthlan puan chu a hun rih lova an hriat thu sawiin, "Hripui leng khawlaiah a darh tan a, khaw lian leh khaw te hmun tam takah total lockdown puan mek a ni a. Chuvangin Polling Booth leh Polling Party zawng zawngte PPE-a thuam vek turin kan phut a ni," a ti a. Tuipuiral mipuite chu lir nghing an tawrh avangin an tan VC inthlanah hun dang ruat sak se an duh tih a sawi bawk.

Register party atanga inthlan chuh tum te tan ECI Registration Certificate thil tel a ngai chu ZPM tan a buaithlak hle dawn nia sawiin, "Hripui vanga khaw tam tak inkharkhip vang te, inkalpawhna kawng chhe lutuk vanga transport service mumal loh vang tein, ECI Registration Certificate hi khaw tinah thawn thlen hman rual a ni lo a. Hei hi hre fuhin, ZPM-in harsatna a tawh theih dan tur hisap ranin VC/LC inthlan hi MNF sawrkar hian hmanhmawh takin a buatsaih niin kan hria a. SEC-ah kan dil leh ang a, mipui ten an duh an thlanna dal lo tur zawngin kawng min dappui leh theih ngei kan beisei a ni," a ti a.

Hetih laia SEC in common symbol zinga mi 'Khumbeu' hman a phalsak chu lawmawm a tih thu a sawi. Lalliansawta chuan MNF party-ten VC/LC candidate an zawnnaah, an mi duh zawng nawrna atan, an lamhnai sawrkar hnathawkte tawng chhanah hmangin tui lo chunga ding tur te pawh an awm niin a sawi a, "Hetiang em ema politics chhia leh tenawm hi Mizoramah a la thleng ngai lo a, a pawi takzet a, tun hnuah thleng tawh ngai lo se kan duh a ni," a ti a. VC ten an chanvo tur an chang em tih chu an en reng dawn nia sawiin, "15th Finance Commission chuan kum 2020 - 2021 atan Mizoram VC-te pualin sum cheng vaibelchhe 93 a rawn dah hrang a, state sawrkar zenpui theih loh turin khaw tin chan tur pawh then fel vek a ni tawh a. State sawrkar pawhin State Own Tax Resources (SORT) atangin 15% chu VC-te insem turin a dah ngei tur a ni bawk. He kalphung hi sawrkarin a zawm em tih kan veng tlat dawn a. Chuvangin ruling VC nih vanga hamthat fal bikna tur a awm tawh lo a ni," a ti bawk.