Aizawl : Nimin khan AMC inthlantur denchhenin ZPM thalai headquarters chuan Aizawl veng hrang hrang-ah te street campaign an nei a, street campaign ah hian star campaigner TBC Lalvenchhunga leh B. Lalchhanzova-te bakah candidate-ten thu an sawi a ni.

He huna thu an sawina hovah TBC Lalvenchhunga chuan, AMC-ah ZPM in sawrkarna a chan chuan, kalphung thar hnuaiah rorel a ni ang a, mipui mamawh leh hmasawnna tur dan siam a ni ang a, mipuite harsatna thlentu dan paih niin, rorelna tha siam a nih tur thu a sawi a. Mipui hmanga sum siam a, intihtheih chu sim tawh turin ram hruaitute a ngen a. AMC-ah state ruling sawrkar lo mah se, AMC sum hmuh tur leh a hmuh dan phungah danglamna a awm lo niin a sawi a. “Sawrkar hian a duh zawng tiam lovin, kan duh zawng hi sawrkar min tiam turin i nawr ve ngam tawh ang u,” tiin mipuite a fuih a ni.

B. Lalchhanzova chuan, “Ei zawn awlsam zawkna Aizawl din tharin, rethei leh dinhmun tha zawkte indip dal lova lungmuang zawka kan chen tlan zel theihna khawpui i din ang u,” tiin mipuite a sawm a, hmeichhia, naupang leh kum upate thlamuanna Aizawl thar siam turin Aizawl mipuite a ngen a ni. Tute pawhin Aizawl khawpui hi ‘a dintu zinga mi ka ni,’ kan tih theuh theih nan mipuite nena kal rual thiam ZPM, AMC a pian theihna tura thawhho puiah mipuite a sawm bawk a ni.

ZPM thalai hian AMC kaltlanga mipuiten an beisei ngam tawh loh, mipuite chanvo nawr chhuah a nih theihna turin AMC intlanah ZPM lo vote theuh turin mipuite an ngen a ni.

ZPM thalai headquarters hian Aizawl veng hrang hrang heng : College Veng, Bethlehem Vengthlang, Bethlehem, Chite, Armed Veng South, Armed Veng, Tuithiang, ITI Veng, Salem Veng, Mission Veng, Mission Vengthlang, Nursery, Maubawk, Khatla-ah te street campaign hi an nei a ni.