Aizawl: ZPM Elected Office Bearers meeting chuan Mizoramin harsatna khirhkhan tak kan tawh denchhena mimal leh party tana hmingthat lak tumna anga ngaih theih thil a awm leh thin chu pawi a ti tak zet tih an sawi.

Zirtawpni khan ZPM Elected Office Bearers (Extended) chu thukhawmin khawvel hmun hrang hrang tibuaitu Covid 19 (hripui) leng Zoramin kan lo hmachhawn danah, mipuite tanrualna leh thuawihna chu lawmawm an tiin chhuanawm a ti tak zet a. Hetiang hun harsa leh khirh kan tawh laia mipui himna leh thlamuanna atana chi hrang hranga thawktu zawng zawngte chungah ZPM chuan lawmthu a sawi a ni.

ZPM OB thukhawm chuan tun hnaia MLA pakhatin mipui sum MLA Local Area Development Fund hmanga natna hrik enna khawl a lei chungchang leh sawrkara a pek luh tum danah te, sawrkarin a lo dawnsawn tum danah politics-a hamthatna neih tel duhna leh hamthatna dawng an awm ang tih hlauhna nia ngaih theih thu inchuh, a dik zawk hriat harsa khawpa inpuh tawnna a awm chu pawi an ti a.

Tun hnuah khatiang chi kha thleng tawh lo se, ram hrauitu ten inzah tawn takin mipui rawng bawl thin turin an ngen a ni. Meeting chuan Covid 19 hripui hi fimkhur tak leh khauh taka do chhunzawm a ngai ngei dawn tih sawiin sawrkar chu lo inruahman lawk tawh turin an ngen a, ruahmanna siam thar a awm leh hunah, inven hna thawh hautakna lai bera thawktu, ramhnuaia riah-chilhtute chu mangnghilh tawh lo tura an duh thu an sawi bawk.