Aizawl : November 2, 2022-a ZPM Political Affairs Committee thukhawm chuan MNF sawrkar chu kuthnathawktute tharchhuah dehralna ngaihtuah sak turin an ngen a, state pahnih inbiakna hmachhawp awm chunga inbiaknaa tel tur Minister te an zin chu kuthnathawktute ngaihpawimawh lohnaah an puh sak bawk. 

ZPM party chuan, Mizoram chhunga kuthnathawktute tharchhuah dehralna kawngah hun rei tak atangin harsatna kan tawk nasa hle a, hei hi kan ngai pawimawhin kuthnathawktute tan theihtawp chhuaha an harsatna sutkian a nih theih nan hmalak zel tha kan ti. Kan thlai thar hralhna kawnga harsatna tawh mekte a ranglama sukiang tur leh hma la thuai turin Mizoram sawrkar kan phut, an ti.

Assam sawrkarin harsatna a siam thin sutkianna tur zawnga state pahnihte inbiakna kal lai mek hmachhawp chungchang sawiin, "Inbiaknaa tel tur Revenue Minister leh Law & Judicial Minister te ram danga an zin khawthawn avanga inbiak hun sawn rawt a ni hian kutthnathawktute harsatnate Mizoram sawrkarin a ngaihpawimawh tawk loh zia a tilang chiangah kan ngai," an ti bawk.