Aizawl September 26, 2022: Vawiin khan ZPM PAC Member, TBC Lalvenchhunga leh ZPM Vigilance Department chuan Kolasib Press Club-ah Press mite an kawm a, Kolasib Fast Track Court building sakna tur lungphum phumnaa inlan, minister K. Larinliana In-a chaw ei Abu Mazumdar (Abub Ahmed Mazumder) chungchangah MNF leh sawrkar chu insawifiah turin an phut. 

TBC Lalvenchhunga chuan, "Abu Mazumdar (Abub Ahmed Mazumder), Assam lama dan pawisa lo leh Assam sawrkar pawhin a veh reng thin, tuna bail-a chhuak mêkin Kolasib Fast Track Court thar tur lungphumna program-a a tel ve ringawt leh FCS&CA Minister Pu K Lalrinliana In-a thlamuang taka chaw a ei lai kan hmuhin a hmun ngeia rawn finfiah thain kan hria a. Nikum lawkah state pahnih Chief Minister ten ramri chungchang sawi tura an inkawmnaah he Mazumdar-a hi a tel tawh bawk a. He smuggler, case nei lai mêk leh kan sawrkar inzawmna hi Minister leh MNF Party hian sawifiah turin kan phut a ni," a ti. 

TBC Lalvenchhunga chuan, "District Fast Track Court hnen atangin Abu Mazumdar a hi sàwm a nih loh thu kan finfiah a. Hnam party inti te zinga a tel ngawt hi tu sàwm nge ni a, tunge a ILP hi sponsor tih leh Mizoram sawrkar hian buhfai supply tura engvanga la hmang reng nge a nih a. Dan pawisa lo smuggler-in Mizoram supply minister In-a thlamuang taka chaw a ei tih kan hriat hian hnam party inti te, Pathian leh kan ram tan titu te hian hnam dang lakah kan ram hi an hralh mêk em ni, tih hi kan zawhna a ni," a ti bawk.

ZPM Vigilance Department General Secretary, SL Ngursailova Sailo chuan, “Kolasib Fast Track Court lungphum-a technical report leh contract agreement zat in ang lo te, court room kim lo leh lift kim lo te hi kan enzui dâwn a ni,” a ti bawk.