Aizawl June 28, 2022 : ZPM Legislature Party Secretary, Dr. Vanlalthlana chuan Ministry of Finance, Govt. of India hnena RTI-a zawhna atanga chhanna chi hrang hrang kan dawn atang hian sum tam tham tak, kan budget document a tarlan loh kan hmuchhuak a. Sum pawh lo dawng ni teh reng se la, a account dahna a danglam hian hman theih dante a danglam theih avangin kan ngaih a tha lo va, sawrkar chu a sum dawn te an dahna leh an hman dan felfai taka tarlang turin kan ngen a ni, a ti.
    
Nimin khan ZPM NLA pahnih Dr. Vanlalthlana leh V.L. Zaithanzama te chuan Chanchinthar lakhawmtute an kawm a, Dr. Vanlathlana chuan, "15th Finance Commission hnen atangin kum 2020-21 khan Urban Local Body (ULB) leh Rural Local Body (RLB) atan Rs.13,800 lakh (4,500 lakh + 9,300 lakh) kan sorkarin a dawn laiin Annual Financial Statement 2022-23, 07-Finance Commission Grant, 103-Grants for ULB & RLB-ah 2020-21 (Actuals) column-ah hian Rs.4,500 lakh chauh tarlan a ni," a ti a. "RTI chhannaah hian kan state sawrkar hnenah Rs.9,300 lakh pek tel a ni tih a hmuh theih a, Rs 9,300 lakh hi khawiah nge a awm?," tiin sawrkar an zawt.

"Special Assistance for Capital Expenditure (50 years interest free loan) atana kan state sawrkarin Rs.49,999 lakh (Rs.20,000 lakh + Rs.29,999 lakh) a dawn laiin Annual Financial Statement 2022-23-ah 6004- Loans and Advances from the Central Govt., 106 – Special Assistance zawnah hian kum 2021-22 (RE) ah Rs.29,999 lakh chauh tarlan a ni a. RTI chhannaah hian kum 2020-21-ah Rs. 20,000 lakh pawh Mizoram state sorkar hnena pek tel a nih thu tarlan a ni a, khawiah nge a awm a, entin nge hman a nih?" tih chu an zawhna a ni bawk.

ZPM Legislature Party chuan, "Kan budget document-a dik lo tarlan tumna leh budget buaipuitute tihhminghliau tumna ai mahin, kan state sawrkarin sum a dawnna account tihdanglam a ni hi kan ngaih a ti tha lotu a ni a. Rs.29,300 lakh (Rs.9,300 + Rs.20,000 lakh) lai mai telh loh emaw account danga awm thei tur hi a hman lohna turah an hmang mai ang tih kan hlauh avangin he thil hi mipuite hriatah kan puangzar ta a ni," an ti. 

ZPM chuan Kum 2022-23 Mizoram State Annual Budget bu-a Annual Financial Statement leh Receipts Budget chu en mai chuan felfai deuhin a lang a, Chik zawka en erawh chuan thil dik tawk lo a awm nia an hriat avangin Febuary-March, 2022 chhunga Assembly Session neih takah khan 15th Finance Commission grant hnuaia Rs. Vbc 93 kan hmuh zawh loh thu auchhuah pui a ni tawh, an ti. "Chief Minister Zoramthanga, Finance Minister ni bawk chu state sum enkawlnaah hian fimkhur lehzuala kal a, chik lehzuala budget te lo enpui turin ZPM Legislature Party chuan kan ngen bawk a ni," an ti.