Aizawl June 12, 2023: Vawiin ZPM chhung inkhawma hun hmangtu Vanneihtluanga chuan ZPM vote tur zawng zawng a hrilh duh chu ZPM an vote-in eirukna an do a ni, dikna leh rinawmna an vote dawn a ni. Chutiang tur chuan Pathianin a buatsaih mek niin a sawi.

Vanneihtluanga chuan thu sawiin, “Mizorama political party zingah ZPM hi beiseina sang ber a ni ve tawp mai a ni. Thli hi khawi atangin nge a lo kal kan hre lo, kan thawhrimna leh thawh nasat vanga heng hun hi thleng kan ni lo, Pathian a che a ni. Kawng hrang hrangin min chirhtheh mahse kan chhang vek dawn lo. MLA din tum zingah, kan hotute zingah hian eiruk tum kan awm em, chutiang rilru pu kan awm a nih chuan kan telna tur a ni lo tih i hria ang u. Chutiang rilru pu kan chuan kei ngei pawh hian nasa takin ka bei chhunzawm dawn che u tih lo hre teh u. ZPM vote tur zawng zawng ka hrilh duh chu ZPM-in vote hian eirukna in do a ni, dikna leh rinawmna in vote dawn a ni. Chutiang tur chuan Pathianin a buatsaih mek che a ni,” a ti.

Tluanga chuan, “Vawiinah hian party lo kal tawh zawng zawng kha a pawnga puiin kan sawisel lo, an kawng zawh thin tha lo kha kan zawh ve a nih chuan Pathianin min ti mualpho ngei dawn a ni. Dikna leh rinawmna bosal zawnga kan che a nih vaih chuan thli neitu hian min chhem khum daih ang tih hi i ringhlel lovang u. Mipuite hian ZPM sawrkar tir hi an tum ber a ni lo, Zoram tha zawk siam turin ZPM hi min beisei mai chauh a ni zawk,” a ti.

Vanneihtluanga chuan, “ZPM party kan nih chuan i lawm em em phawt ang u. Dikna leh rinawmna hi a nget dawn lova, a pawimawh telh telh zawk dawn a ni. Kan sawrkar avanga rethei telh telh ngam zawk ni turin inbuatsaih ila, ram tana tih tur sawi mai hi kan tih tur a ni a, mi dang tan, kan ram tan kan ZPM a, mahni pumpui tan nilo, Mizoram tan i ZPM ang u. Tlin leh chak hi zawh loh palh theih a ni a, eng dinhmunah pawh ding thiam nih i zir ang u. Kan thahnemngaih chhan hi Mizoram tan ni se, keimahni aia pawimawhah he ram hi i dah phawt ang u. Pathianin Zoram thar siam turin min buatsaih mek a, chumi zinga ka tel ve thei hi ka lawm a, Pathian rinchhanin hmalam i pan zel ang u" tiin kalkhawm te a sawm.