Aizawl: Zoram Peoples Movement (ZPM) chuan ni 27.8.2020-a LC/VC inthlanna loawm turah voters te himna ngaihtuah an duh tih an sawi.

Nimina thuchhuah an siamah ZPM chuan hrileng avangin kum upa leh hriselna lama harsatna tawk mekte tan a huphurhawm hle dawn nia sawiin vote tla pawh a tlem phah ngeiin a rinawm an ti a. 'Heti chunga kan inthlang dawn anih chuan State Election Commission (SEC) hian Election Commission of India (ECI) in voters te himna tura a duan angin vote thlak tute himna tur ngaihtuah sak sela, kutkawr (glove) him leh hmai khuhna (Face mask) a thlawna hman theih tur te leh kut sil faina tur sahbawn leh tui thianghlim te pawh polling area-ah chhawpin a hmunhma te kap thianghlim ngei se, ballot paper leh a chhutna seal pawh voters te tana him ngei tura buatsaih turin ZPM chuan a ngen a ni,' an ti.

ZPM chuan khua leh tui ten kan mawhphurhna hlen chhuaka vote kan thlakna turah mitin ten ngaihtha taka vote kan thlak theih nan Mizoram sawrkar hian vote thlaktu ten vote an thlak avangin hri an kai phah dawnlo a ni tih puang chiang se, vote thlak avanga hri kai palh an lo awm anih chuan a chhawmdawl dan turte pawh puang chiang ngei se ZPM chuan a duh a ni, an ti bawk.