September 15, 2023; ZPM Leader, CM candidate ni bawk Lalduhoma'n, amah chibai tumtu nia lang lak a a tawngkam hman chuan sawi zui a hlawh a, fak an awm laiin, seltu lam pawh an tam niin a a lang.

Nimin khan ZPM Champhai North Block Conference leh mithar lawmluhna hun, Kahrawt Community Hall, Champhai ah hman a ni a, chuta sawizui hlawh leh video viral ta chu, chu hun hmanpuitu ZPM Leader thusawi laia thil thleng a ni.

Video viral a a lan danin, ZPM Leader thusawi laiin, amah chibai tumtu nia lang mipa pakhat chu stage ah a chho a, chu chu ushers mipa pakhatin lo dangin, ZPM Leader in a hrilh angin, stage atanga hruai thlak a ni.

Heta ZPM Leader tawngkam hman hian nimin tlai lam atang khan social media a luah nghal a, comment tu tam takin an sawisel laiin, tha ti zawng leh a huaisen thlak ti zawng a comment pawh an awm a, ngaihdan a inanglo.

Engpawhnise, inthlanpui kum a ni a, political party tin ten tan an khawh a, hmun hrang hrangah party thil tih a awm chho a, 'sawi fuh' te, 'khak sual' te, 'sawi áwm lo' a ngaih thleng a sawi palh te pawh a la awm chho zel dawn niin a lang!

Khawpui a ni emaw, thingtlang a ni emaw, khawi hmun pawh social media in a luhchhuah tawh a, chu chu 'thatpui theih' a nih tluk zetin 'that loh pui theih' a ni tih hi thil chiang, pawm ngei ngei ngai a ni !