Aizawl: Zoram People’s Movement (ZPM) hotu Lalduhoma MLA chuan ni 7.10.2019 khan Assembly Speaker hnenah lehkha thawnin ZPM Legislature Party chu awm chhunzawmtir tur in a dil a. Speaker hian an dilna leh an lehkha thlen te hi Assembly Secretariat thawktute a zirchian tir mek.

Lalduhoma, MLA-in Speaker hnena thu a thlen zingah hian Mizoram Political Party hrang hrangte chu inthlanna ah thawkho in Independent/ Common Candidate te kan siam thin a. Kum 2018 Legislative Assembly Election-ah khan, recognised party 2 leh register loh party/pawl dang 4 te chuan, thawhhona huang Zoram People’s Movement tih hming invuahin, candidate intawmin, symbol thuhmun hmangin, independent candidate angin inthlan kan hmachhawn ho va.

He thawhhona hi inthlan chhung atan chauh ni lovin, he thawhhonaa tel pawl zawng zawngte chu political party pakhata inchhun khawm vek tumna nena thawhhona a ni. Vanduaithlak takin, Election Commission of India-a Registration kan dilna chu chinfel hman a nih tak loh avangin, kan Candidate te chuan Independent angin an chuh lo thei ta lo va, chu chu party la register lohte leh tun hma lama thawhhonaa an tih thin dan pangngai tho kha a ni, a ti a.

India danpuiin, “Independent MP emaw MLA emaw chuan, thlan tlin a nih hnuah political party a zawm chuan bân (disqualify) a ni ang,” a tih nen a inang lo tih a sawi.

Independent candidate-te chuan candidate dang nen symbol, flag inang an hmang thiang ve lo va, ZPM candidate-te erawh chuan flag, policy leh manifesto thu-hmun kan hmang vek a. ZPM-a rinawm taka awm tura intiam MLA-te hian, kan thutiam leh min thlangtute chu phatsanin party dang zawmsan ta chu ni ila, rinhlelh rual lohin phatsantu kan ni ngei ang. Mahse, min thlangtute leh an duh dan chu kan kalsan miau si loh avang hian, phatsantu angah kan inngai thei thlawt lo a ni, a ti bawk a.

Political party ding thar reng reng, an din tirha registration emaw, recognition emaw nei nghal an awm ngai lo tiin registration la nei lo party-ten an thlan tlinte chu an MLA nihna hlihsak (disqualify) a ni zel dawn a nih chuan, tun hnuah Party thar dinna tur kawngka chu chatuanin khar a ni tawh dawn tihna a ni a.

Democratic Institution zahawmna vawnhim nan te, kalphung leh tihdan a lo neihte chhawm nun a nih zel theih nan te, ZPM Legislature Party hi a pangngaia kaltir zui zel turin, tih tak meuhin ka ngen a che, tiin a ziak a ni.

Assembly Speaker chuan ZPM MLA te inhlawmkhawmna ZPM Legislature Party (ZLP) chu a tirah a pawm a, mahse ZPM hi political party anih tak avang leh ZPM MLA te chu inthlannaah Independent anga an chuh vek avangin ZLP chu a din zel a rem tawh loh thu September 19, 2019 khan a hriattir a ni.

Zoram People’s Movement (ZPM) MLA te chu Independent a ding an nih avangin political party zawm an neih chuan MLA atanga ban (disqualify) theih an ni tih Assembly Secretariat thawktu te chuan Zalen an hrilh a. ZPM MLA te chu inthlan an chuh dawnin Independent vekin an chuh tih sawiin Election Commission of India in thlantlin an nihna certificate a pekah pawh ‘Independent’ ti veka ziak an ni tih an sawi bawk.