ZALEN July 29, 2025 : Congress Thalai chuan NH-306 kawng Buichali leh Kawnpui inkar kawng vil tura ZPM Legislature Party-in an Minister leh MLA ruahmanna a siam chu PWD Minister an rin zawh loh zia tichiangtu-ah an ngaih thu a thuchhuah an siamah an tarlang a, PWD Minister rin tawk lohna 'No Confidence an Move' an a ni an ti.

MPYCC chuan, "ZPM sawrkarin an inzawrh dan lo anga Mizoram chaklakna kawngpui ber siamthat ngai pawimawh loh avanga Mizoram harsatna kan tawh hnuah NH-306 kawng Buichali leh Kawnpui inkar kawng siam hna, Minister leh MLA ten nitina vil tura ZPM Legislature Party-in an ruahman chu thil tha ang taka lang nimah se, ZPM sawrkar ngeiin PWD Minister an rin zawh loh zia tichiangtu leh an thawhpui PWD minister rin tawk lohna 'No Confidence an Move' tih an lantirah Congress Thalai chuan a ngai a. Hetiang hi Mizoram sawrkar awm tawha thil la thleng lo leh thil zahthlak a ni a. ZPM Ministry hi a chhunga a buai nasat zia pawnlamah thup rual lohvin a langchhuakah kan ngai a ni," an ti. 

Sawrkar inthlahdah avanga anmahni department chan pawh buaipui hman lo leka kawng chhe siam vil a, Forest Minister te, Sports Minister te, Social Welfare Minister adt. te kawng siam vil daih chu kalphung Thar hlauhawm leh dawngdahna nasa takah an ngai bawk.

Congress Thalai chuan harsatna a thlen hnu leh thil nih dan tur zawng zawng a thlen vek tawh hnua Minister leh MLA ten kawng siam an vil a, PWD E-in-C leh DC ten kawng an tlawh thung chu Kalphung thar lehlin zia leh kalphung mumal an neih loh zia ti chiangtu a ni a. Driver tangkhang riltama siamtuten mipui bumna atan thlei bik neia eitur an sem chu lemchanna dik takah Mizoram mipuiin an ngai tih ZPM sawrkar a hriattir a ni.