ZALEN March 6, 2025 : Mizoram Pradesh Congress Committee chuan vawiin khan Lal Thanhawla Auditorium-ah tun hnaia Local Council leh Village Council-a party tana dingte hnenah lawmthu sawia Cetificate Hlanna hun an hmang a, President Lal Thanzara chuan ZPM leh MNF sawrkar chu an intiam angin an awm lo a ti.

MPCC President Lal Thanzara chuan, "Min enchhin rawh u ti, ZPM enchhin sawrkar kan nei mek a. Airport suasam an tum danah kan enchhin tawh a, kan enchhin atang hian political party hrang hrang leh NGO te chuan mark kan pe sang lo hle a ni."

"An intiam angin Kut hnathawktute ngaihsak leh duhsak bik tura an insawinaah hmunphiah chungchangah nikum lamah kan enchhin a, hmunphiah chingtute tan beisei a bo in an khawngaithlak hle a ni. Kan hunlai tea a nuai tela a hlawkna an tel laiin kuminah an heh a hil hle. Hmunphiah lei chungchangah enchhin sawrkar hian pass mark an hmu lo," a ti.

"In kawtkaiah kg-ah Rs 50 in kan rawn la ang tia sawhthing ching tura min fuihtute kan enchhin mek a, an intiam angin an awm lo mai ni lovin, hah taka beiseina sang tak nena sawhthing ching a, beiseina sang tak nena enchhin tute thinlung an ti na chho mek a ni. Hei hi kan enchhin sawrkar dinhmun a ni," a ti bawk.

MPCC President chuan, "MNF pawh hian inthlan dawn a piangin thutiam ropui tak tak an nei thin. Mahse Economic leh development-ah a hlawhtling sawi tur kan nei em? A hmasa berin independent min tiam a, kan chan chu hmeithai tam tak siam a ni ringawt mai, chutah state ralmuangah kawng chhawng siam te mintiam a, kawngchawng siam kan nei lo va, leiverh inkal pawhna pawh kaw pakhatmah pawh an la verh lo va. Cheng sing sariha kut hnathawktute tanpui min tiam a, tumahin singsarih an dawng lo va, cheng nuai thum lai NLUP dawng tawh pawhin in dawng ang an tia, tumahin nuai thum chu sawi loh nuai khat pawh kha intiamna atang khan dawng an awm awm lo ve," a ti. 

Lal Thanzara chuan, "VC leh Local Council level atang hian Mizoram mipuite i inharh ang u. Intiamna kawrawng mai maiah innghat tawh lovin, Congress a thutiama a din thin dan te, MNF hnuaiah ram a ralmuang em, hma kan sawm em tih te, ZPM kan hrawn mek a, 'kan intiam anga kan awm loh chuan kei chu Chief Minister nih pawh ka duh lovang,' titu a CM mek a, an intiam angin an awm em kan enchho mek dawn a ni," a ti bawk.