Aizawl: Nimin khan ZPM Working President K Sapdanga chuan Tuirial bial, Serkhan leh Bukpui khuaah te public meeting neiin hun a hmang a, ZPM Candidate Laltlanmawia thusawina hun a nei bawk. K. Sapdanga chuan mi thenkhatin ZPM leh MPF inkarah hem thlak an tum niin a sawi.

K Sapdanga chuan, "Tun hnaiah mi thenkhat khat ten ZPM leh MPF te in kârah hêm thlâk an tum niin a lang a, MPF leh political party te thawhhona thuthlung hi political party zawng zawng ten kan sign vek a, keini ZPM party pawh hian zawm hram hrâm i tum ang u tih hi kan in zirtir dan a ni. MPF te hmalakna a fakawm thin em em a, khawi pâwl mah duhsak bik leh ṭan bik nei lova thawhhona thuthlung dan bawhchhia te chu na takin an khak fawk mai zel te hi a ropui em em a ni," a ti. 

Bial mipui te fakin ZPM working president chuan, "He bial hi ram leh hnam hmangaihtu dik tak awmna bial a ni a,  kum 2018 general election khan party mumal taka kan in form hma, unit pawh nei mumal lo kan nih lai a ZPM candidate lo thlang tling tute kha in ni a. Bial mipuiten rilru fîm tak hmanga vote in thlak vang a ni a, tun tumah pawh hian rilru fim taka vote thlak leh turin ka sawm duh che u a ni," a ti a. "He ramah hian ram rorelna tha awm se kan duh a, thil tha a pian theih nân thil tha lo kan ti dâwn em ni. Hlemhletna in vote kan zawng tur a ni em ni, ZPM Candidate hian i vote kha sum a rawn lei a tum a nih chuan, lo vote loh phah ngam rawh. Chuti lo chuan he ramah hian rorelna tha apiang ngai lovang. Pawl dang kan sawisak ngam lo, ZPM chhungah chuan ram rorelna tha din kan duh a, bawlhhlawh taka tlin ai chuan, thianghlim taka tlak kan duh zawk," a ti bawk.

ZPM Candidate Laltlanmawia chuan, "Political platform a ding ngai lo ka ni a, vawiin ni a ka rawn din chhuah ngawt chhan chu kan ram hian dikna rinawmna a mamawh, chumi chu kan tundin a ngai. Ka fel ber ka tha ber ka ti lo, amaherawhchu dik tak leh rinawm taka thil tih duh mi ka ni a, kan ram mipuite tân hian entawn tlak hnutchhiah ve theih hi ka in beisei tlat a ni. MNF leh Congress hian sawrkarna an lo chang rei tawh, kan ram budget an ei zo hnem tawh, sum an rawn hmachhuan a nih chuan kan chanpual min chhuhsak kha tlem a zawng min pe ve a ni tih lo hria ula ka duh a ni. Pathian laka kan inthiam lohna tur thil reng reng hi chu i ti lo ngam ang u," a ti bawk.

Serkhan leh Bukpuia campaign hi MPF kaihhruaina hnuaia hun hman a ni.