Aizawl June 1, 2023 : MNF chuan Aizawl North II MLA Dr Vanlalthlana'n a bial chhhungah pawl rintlak, sorkar pawmpui pawl veng tina an awm lai leh Local Council tha tak tak an awm laia Aizawl North Development Society a din chawp chu a biala hmasawnna hna zawng zawng deuh thaw a thaw tir an ti. Agency dik leh rintlak tam tak a biala an awm laia pawl dinchawp deuh vek a hmang tiin mak an tih thu an sawi.

MNF chuan, "Mipuiin an aiawha veng chhung rorel tura an thlan Local Concil-te leh tlawmngai pawl zahawm tak tak YMA, MHIP, MUP leh NGO dangte zahlohnaah kan ngai a ni. Aizawl North II bialtu MLA Dr Vanlalthlana hian an Party bil mi tlemte duhsakna hleihluak takin a kalpui mek a, agency dik leh rintlak tam tak an awm lain an party bil liau liau an invulh theih nan agency a dinchawp duh hi MNF chuan mak kan ti a. He agency dinchawp hmanga an hnathawh hlawkna hi ZPM Party bil mi tlemte leh an MLA hian an pumbilh mek a ni," an ti. Khawtlang leh tlawmngai pawlte pawh zah zo lo a, an agency din chawp hmanga an invulh duh hian ZPM zia dik tak a pholang chiang hle an ti bawk.

MNF chuan, February 16, 2023 khan Ramhlun South YMA, Y Section chuan thuchhuah an siam a. An thuchhahah chuan, ZPM, Ramhlun South Unit III te chuan Vengchhung House sak nana MLA fund Rs 2.50,000/- an hmuh chu Ramhlun South YMA, Y Section In sak mek sak chhunzawm nan an hlan a ni. Tin, hemi Sum atrang han Rs 30,000/- (12%) chu ZPM Ramhlun South Unit III te hnenah Rambun South Branch YMA, Y-Section chuan lawmthu sawi nan hian pe let a ni, an ti

"Ramhlun South Branch YMA, Y-Section-te thuchhuah hi thudik tak a ni a, he an thuchbuah atanga a lan danah hian ZPM Ramhlun South Unit III-te hian MLA fund an dawng tih a lang chiang hle. MLA Fund Party unit hnena pek hi danin a phal loh a ni. ZPM Unit-in YMA In sakna atanga 12% (Rs 30000/-) an la duh ngat phei hi chu a mak hle. Party mite hleihluak taka duhsak duh vanga dan phal loh thlenga thil ti duh ZPM MLA chet dan hi, an thusawi thin dan na inmil lo a. An sawrkar lo chung pawha dan bawhchhe khawpa uchhuaka Party mite an duhsak duh hian, khawi lamah mah mipui sawrkar an din lul lovang tih a chiang a ni," an ti bawk.