Aizawl: Zoram Peoples Movement MLA te chuan social media lamah Mizote tih hmingchhiatna theh darh a ni tiin hemi chungchang chhuichiang tur hian Aizawl Police Station ah FIR (first information report) an thehlut.

ZPM Legilature Party aiawh hian an Secretary Dr. Vanlalthlana chuan Zirtawpni kalta khan FIR hi a thehlut a. FIR a inziah dan chuan April ni 18,2020 a 5th IR Bn. duty mi 2 kutthlak an nih chungchangah leh a hnu April ni 20,2020 a in ruak 1 a kan chungchangah thu phuahchawpin YMA leh MZP te an inrawlh niin facebook page pathum 3 - Sakya Clan, World Chakma News No.1,

Chakma Media ah te tarlan a ni tih an sawi a. He thu diklo thehdarh hian thil pawi tak, hnam leh hnam inhuatna thlengin a thlen thei a ni tiin dawta Mizo mipui puhtute hi chhuichhuak a, a tul anga hremna pe turin an ngen a ni.

Facebook lamah hian YMA (Young Mizo Association) leh MZP (Mizo Zirlai Pawl) mi thahnem tak chu lirthei engemaw zat nen Tripura ah hian kalin zan dar 8 velah Chakma chhungkaw pakhat chenna in chu an hal niin an tarlang.