Aizawl April 24, 2023: Vawiin khan ZPM chuan chhung inkhawm an nei a, he huna mithar lawmluhna hun hmangtu President Lalliansawta chuan candidate beisei chang ta lo an awm a nih pawhin chhungkua-ah buaina thleng lo turin a chah. Thusawitu dang Vanlalhlana, MLA chuan Corruption tih tawp ngei an tum thu a sawi ve bawk. 

Mi thar lawmluh paha thusawitu Lalliansawta chuan LMC election leh Local Council By-election a hnenah an chan theihna kawnga thawktute chunga lawmthu a sawi a, Leader Lalduhoma leh an Working President te thawhrimna chhuanawm a tih thu a sawi. 

Candidate tur te thlang tur nomination committee hmalakna sawiin ZPM President chuan, "Kan boruak hi kan hria a, nomination committee din a ni a, tum eng emaw zat kan thu khawm a, harsatna leh inlungrual lohna lian tham awm lovin kan tih tur kan ti zel thei. Tun hnai maiah khan bial han fang a, han ta neih deuh tur mi 35 ruatna lehkha pek an ni a, candidate nghet erawh an la ni lo. Harsatna leh thil thleng lian tham a awm a nih chuan thlak leh theih tura ruahmanna hi siam a ni," a ti. 

Candidate chan vek theih a nih loh thu sawiin, chang lo te lungawi lohna lantir lo tura ngenin Laliansawta chuan, "Eng eng emaw boruak neuh neuh heng thilah hian awm thei a ni a, kan elpui party dang game-ah lut lo turin kan inbeisei tlat a ni. Kan ramah hian MLA seat 40 kan nei a, mi tha tak tak kan lo thathnem ve tak avangin kan vaiin seat hi kan changkim thei dawn lova, chhungkaw buaina a thlen lohna tura inveng turin ZPM mi leh sa kan insawm a ni. Nomination kan din tirh atang khan mi tam takin huaisen takin kal rawh u, tiin min fuih a, tunah hian huaisen takin ke kan pen a ni. Lungawi lohna kan nei a nih palh pawhin social media-a ang mai lovin nomination committee-in ruahmanna a siam pawm turin kan inchah a ni," a ti

ZPM legislature Party Dy. Leader Vanlalhlana pawhin tunhnaia inthlan an hmachhawnah a tam zawkah hnehna chang mah se, ITI LC by-election thlirin chak lo theih a ni tih hriat a pawimawh thu sawiin, "Heng inthlan atang hian zir tur kan nei a, inthlan apianga chak tura kan inngaih lai hian chak lo thei kan ni tih hriat a tha, kan tha kan tia kan hlim em em a, chak lo thei kan ni tih inpawm chung hmalam pan i tum ang u. Tunah hian bial hrang hrang viltu kan nei tan a, Bial viltu kan neih a ngai tawh tih ring takin a ri a, tuna bial viltu tura ruatte hi candidate ngei ngei tur an ni tihna erawh a ni lo,” a ti. 

Corruption chungchang sawiin Aizawl North-I bialtu MLA chuan, “Budget Session neih zawh taka Budget pumpui thlir khan mipui nawlpui tan chan tur a tlem hle a, ZPM kan sawrkar chuan mipui nawlpui thleng phak Budget hi kan tipung dawn a ni. Kan tihpun dan tur chu dik takin sum kan hmang ang a, tul lova sum luang ral thin hi kan titawp ang a, dik taka kan hman phawt chuan pawisa hi a daihzai ngei ngei dawn a ni. Kan Chief Minister-in thalaite beidawng turin party thenkhatin mipui min zirtir tia a sawi mai kha a zahthlak hle a, mi beidawngte beiseina siam thar leh hi ZPM chuan kan tum dawn a ni. Eng hmanrua pawh hmang mahse ZPM hi kan zam dawn lova, dik tak leh fel taka rorelna kalpui turin huaisen takin ke kan pen zel dawn a ni,” a ti.