Aizawl May 3, 2024 : Vawiin khan Mizo Hnam Run chhung inkhawm neih a ni a. Political session-in a chhunzawm a, he huna thusawitu Dr. ZR Thiamsanga, Adviser (MNF GHQ) chuan MNF sawrkar kalta kha hun khirh tak hmachhawn tura ruat a ni a ti. Healthcare hmalaknaah ZPM Sawrkarin health clinic zawng zawng a titawp chu pawi a ti a, ngaihtuah tha leh se a duh thu a sawi.

Ex-MLA Dr. Thiamsanga chuan MNF sawrkarin healthcare a ngaih pawimawhzia a sawi a. "MNF sawrkar hmasain Falkawn Referral Hospital a din chu Congress sawrkar khan medical turin a upgrade a. MNF sawrkar kalta khan a tihpuitlin hna a thawk a. Tunah chuan medical college ropui tak kan lo nei chho ta a ni," a ti.

"Primary healthcare pawh kan ngai pawimawh em em a. Sub-Centre awm lohna khuaah Health Clinic 235 dah a ni. Tin, Sub-Centre 373 chu Health and Wellness Centre-ah upgrade a ni bawk," a ti a. "ZPM sawrkarin Health Clinic zawng zawngte a tihtawp ta mai hi a pawi hle mai. Ngaihtuah tha leh turin kan ngen a ni," a ti.

MNF sawrkar chu healthcare ngai pawimawh bik a nih avangin Niti Ayog tehna small state zingah Mizoram chu a titha ber kan lo ni tawh tih a sawi bawk.

Thiamsanga chuan Mizoram State Health Care Scheme chungchang sawiin, "MNF bultan a ni a, a tirah Rs vbc 50 corpus dah a ni a. A tihchangtlun nan ADB Rs vbc 150 dil a nih mek laiin, Congress sawrkar khan natna thenkhat chauh bill theih turin a hman chhunzawm a nih kha.

"Kum 2018 MNF sorkar tir khan kum tin Rs vbc 50 dah chhoh tumin a kalpui a. Natna zawng zawng bill theiha siam a ni a, enrollment pawh a pung nasa hle. Amaherawhchu, hripui avang khan duh angin kan kalpui thei lo. Healthcare tihchangtlun ADB atangin Rs vbc 1000 kan dil ta a ni."

"Theihtawp chhuaha kan buaipui kha tun June/July chho hian tun sawrkar hian an hmang tangkai dawn niin a lang a. ZPM sawrkar hi an vannei hle. Healhcare ba Rs vbc 95 kan pe hman a. Corpus fund Rs vbc 50 kan dah hman bawk nen, healthcare atana kan hnutchhiah zawng zawng hi a tam tham hle a ni," a ti.