ZALEN March 24, 2025 : Vawiin khan Mizo Hnam Run chhung inkhawm neih a ni a. Hun hnihna - Political session-a thusawitu East Tuipui Bialtu MLA leh PAC Member ni bawk Ramthanmawia chuan Assembly Budget session neih zawh tak chungchang a sawi a, "MNF hi Pathian hruaina leh awmpuina avangin kan hniam ngai lo. Tun sawrkar ZPM kan hrawn mek hian an vah chhuahnaah leh assembly house ah te thudik chanve sawi loin thudik tluantling tak mipui hmaah sawi thin turin ka duh hle a ni," a ti.

Ramthanmawia MLA chuan, "Assembly house-ah 'The Mizoram Youth Commission Bill, 2025' te pawh pass pui kan duh viau rualin Assembly Session-ah Chief Minister, House Leader ni bawk rorelna hmuna a khawsak dan chu ram hotupa ber tiha tan a mawi lo hle a. Hruaitu hmasate sawisel thanhnan a, mite thatna reng reng hmu theilo leh hmu thiam lo CM kan nei hi a pawi kan ti a, chuvanga pass pui lo mai an nih thu a sawi nawn leh bawk. Tin, 'The Mizoram Liquor (Prohibition Act, 2019)' pawh hi Kohhran leh khawtlang duhloh zawng avangin kan pass pui thei lo bawk a ni," a ti bawk.

Papuia chuan party mipuite fuihin, opposition nih tak avanga beidawnga zam mai tur an ni lo. Hotu hmasaten hei leh chen an lo kaihruai tawh a, tumahin party an chhuahsan ngai lo. Thalaite chu politics avanga chaw nghei leh jail tang an awm a ring loh thu leh an hotute vahvaihna leh tawrhna zawng zawngte kalkawng entawna hmalam pan zel tur an ni, a ti.