ZALEN February 25, 2025 : ZPM Thalai chuan February 19, 2025-a MNYF PR. No. 40 of 2025-26 “Mizoram Sawrkarin MPSC a thuam chak tawk lo" tia PR an chhuah chu thu belhchian dawl lo ah an ngaih thu thuchhuah an siamah an tarlang.

ZPM Thalai Hqrs chuan an hruaituten February 18, 2025 khan Mizoram Public Service Commission (MPSC) Office tlawhin ZPM Sawrkarin MPSC a thuam chak dan hrang hrangte a hmunah hmuhpuiin, MPSC lama thawktute pawh an lawm hle a ni, an ti. Kum khat chhung leka ZPM Sawrkarin MPSC a thuam chak tawh dan leh hmalakna te tarlangin :

I. MSSSB thiah a nih avangin MPSC-ah post dah belh a thuam chak a ni a, chungte chu -

1. A/S-1 (redesignation),

2. JH Controller – 1

3. Asst. Controller-1

4. Assistant -2

5. UDC-4

6. LDC-3

7. Group-D 7 te an ni.

II Infrastructure atan minor works-ah funds pek a ni.

III. Grand Barrack cum Canteen sakna tur atan Sawrkarin hma a laksak mek.

IV. SASCI hnuaiah Rs. 10Cr chuangin hmalakna kalpui mek a ni.

V. State Sawrkar atangin Scheme for Implementing of Persons with Disabilities Act (SIPDA) hmangin Disable (pianphunga rualbanlo) te tan toilet siamna tur fund buaipui mek a ni.

ZPM Thalai chuan, "Mizoram-ah Party pahnih Congress leh MNF-te'n mipui min hruai chhung khan mipuite hi bungrua ang maia ngaiin nuai khat leh nuai thumin min lilâm kual vel thin a nih kha!!! Bungrua ang leka min ngaitu MNF leh Congress-te hi Mizo mipuiten kan la theihnghilh lo a ni. Heng Party pahnihte hi an au dan a la ngai reng a. Tin, an Policy pawh a la ngai reng a ni," an ti

"Hmána an hruaitute tho kha tuna an Party hruaitute hi an la nih avangin Mizo mipuite tan beisei leh chi an ni tawh lo a, Kum 38 chhung Kuthnathawktute thlai thar hralhna tur la ngaihtuahsak ngai miahlo te leh hralh hlau ngawih ngawih ni-awma langin tunah Sawrkar hmalaknate an dodal nasa in 'Hlawhchham se/Mualpho se' an lo ti ve mek bawk a ni tih hi Mizo mipuiten kan hriat a tul hle a ni. Opposition tha tak ni turin MNF leh Congress-te hi kan ngen bawk a ni," ZPM Thalai chuan an ti bawk.