ZALEN May 28, 2025; ZPM party thupuangtu K. Laltluangkima’n MNF adviser J Lalhmingliana chu internet awm hma, youtube leh wifi pian hma, google leh facebook pianhma lam a mi a nih thu a sawi.

Nimina thuthar thehdarhtute a kawmna ah ZPM party thupuangtu chuan May ni 19, 2025 khan MNF Adviser J Lalhmingliana chuan Hnam Run-ah thu sawiin, “Tun sawrkarah hian Civil Aviation lamah than i beisei lo ang u, a ngaihna thlawt an hre lo” tih a sawi niin a tarlang.

"Heti chiama an ni ang, mi pangngai angah kan lo ngaih thin ten thu an sawi duh hi a mak a. Amah zawk hian hriat ngai eng emaw zat a nei zawk a ni lo maw ka ti. Amah chauh hi Wing Commander pension Mizo te hian kan nei a ni lova, a ni aia thar lam leh tun lai chin chang hre zawk, sawrkar thahnemngai taka puih hnial lo tam tak, mi tha kan nei tawh a. Tih tak em ah chuan a ni te chu internet awm hma, youtube leh wifi pian hma, google leh facebook pianhma lama mi an ni a, tun lai technology te hi chu a dang lam tawhin hma a sawn lutuk tawh a, an ni ang hi chuan an hriat loh zia pawh an hre tawh lo a ni zawk hial mai thei a ni," tiin ZPM party thupuangtu chuan a sawi.

"MNF-in Airport an sak that mek, loh theih lova ZPM sawrkarin a chhunzawm tak khu a phurawm lohzia kan hre vek," ti bawkin, ZPM thupuangtu chuan, "Sak zawh a la ni lova, sa zo pawh ni ila, thiah leh nghal chakawm khawpa tunlai lo, thang thar te zahpui nghal tur building a ni a. Tunlai tawng takin a futuristic lo rem rem tak a ni. A chhan chu a integrity a chhe em em a, sak mek lai pawhin a chim kha a ni a. Elevated road an tih khu a hniam em em a, Ambulance motor te reuh te pawh a leng lo a, head room a san loh vangin chung lamah a su a nih kha. Mi airport ah te chuan Ambulance chu sawi loh, fire Brigade truck lian pui pui te, Bucket truck te thlengin an tlan kual thei a, chu tho chu kan mamawh ve dawn a. Chung te chu a leng dawn si lova, a hnuai lam lei khu kan khuar leh mai dawn em ni? Chutiang ang design-tu sorkar chu MNF a ngaihna hria inti te kha an ni," a ti bawk.