ZALEN Feb 10, 2025; ZPM chuan sawrkar policy tuipui tur leh phur taka sawrkar hmalakna mahni veng theuh a kalpui thei tur, Village Council member thlan chhuah a pawimawh hle dawn tih an sawi.

Vawiin (10.2.25) chhun dar 12 a Aizawl press club a thuthar thehdarhtute an kawmna-ah he thu hi sawiin, ZPM media & publicity dept. hotute chuan, Local Council (LC) leh Village Council (VC) te chu sawrkar kutke pawimawh tak leh mipui nena inngheng tlat an ni tih an sawi. "Veng chhung hmasawnna leh khawtlang mipuite hmasawnna hi LC/VC te kutah a innghat thui hle a ni. LC leh VC nei tha veng/khua chu khaw dang leh veng dang aiin hma an sawn thin," tiin an sawi.

State sawrkar leh LC/VC ten thawhhona tha an neih a pawimawh hle a, inkawp rem tak leh state sawrkar policy tuipui tur leh phur taka sawrkar hmalakna mahni veng theuha kalpui thei tur VC member kan thlan chhuah a pawimawh hle dawn a ni," an ti bawk.

Opposition LC/VC te zingah thawhpui nuam tak tak, ram leh khawtlang hmangaihna leh rawngbawlna rilru pu an awm laiin, hmun thenkhatah erawh kalphungthar mipui sawrkar rilru pu lo leh policy tuipui lo, khawtlang hmasawnna aia mahni tanghma hai leh sawrkar thawhpui tha duh lo, rotekawla sepa ang maia khawsa an awm ta fo mai niin an sawi a, hemi vang hian

state sawrkar nena inkawp rem sa peh inzarzawm ZPM party candidate te lo thlang tling turin Zoram mipuite an sawm.