Aizawl November 28, 2022 : Mizo Hnam Runah chhung inkhawm Hun hnihnaa thusawitu MNF Adviser  Lalchamliana, Home Minister ni bawk chuan MNF sawrkarin zu a khap hnuah Police thi an tlem niin a sawi. MNF, ZPM leh Congress hruaitute chu MNF chhulchhuak leadership chan loh vanga pawl danga awm niin a sawi bawk. 

Lalchamliana chuan, "MNF sawrkarin Kohhran leh mipui duhdana zu a khap hnuah zu vanga thi Police an tlem. Damdawi ruihhlo do tura CYMA in Central Anti Drugs Squad an din hi tha ka ti a, kan thlawp theuh a pawimawh a ni," a ti. Zoram mipuiten kan awmna hmun theuhah CADS hmalakna hi tawiawm ang u, tiin ngenna a siam bawk.

MNF Adviser chuan Mizoramah party pangngai pathum, inthlannaa in la lian thei an awm mek tih sawiin - MNF, ZPM, Congress an ni. BJP thlengin an hotute hi MNF party chhul chhuak vek an ni. Engatinge MNF an chhuahsana pawl danga an awm? Policy leh thildang a awm lo. Leadership an chan loh vanga pawl danga awm, pawl din chawp an ni. ZPM hi party-a hotu nihna chan loh vanga chhuak an ni. MNF aia inti nationalist a, leader chan loh vanga pawl din an ni. An pawl base hi ZNP vek an ni. Tunhnaiah Pu Thena naute ho PC lam  hmin tumin tawngkam thlum nen a bei leh mek tih sawin, "Sabengtung sakeibaknei vuna inthuam, Sihalin 'a hram hi lo hre fo tawh lo ila chuan kei pawhin ka hlau ang mawle!' a tih kha an ni," a ti. 

"An kalphung thar hi enge hria in awm em? An kalphung thar ber nia ka hriat chu VUC hi a ni. Anni pawh hian a tul an ti lo niang! Hlawhpung lak loh tur, an tia, a duh hmasa sa an ni a. Keini chuan a sema sem kan ti dawn lo an ti a.. Mahse, ZPM MLA in tuizem a sem, puanthui khawl a sem an ti leh tho si. India rama kan awm chhung hian sawrkar laipuiin a duanbak piah lam kalphung thar hi Independent state kan nih loh chuan tih theih a nih ka ring lo.
Congress pawh central thlenga hruaitu mumal nei thei lo an ni a, an khawngaihthlak letling a ni. ‘That loh theih lohna bawm hi hmu in awm tawh em? Lut an la awm lo a ni awm e’ a ti bawk.