Aizawl: Assam lama zu leh ruihhlo laluttu te chu man khawm a, Polytechnic, Thingdawl -ah dahhran (quarantine) zel tum a ni.

Nimin khan Kolasib DC Dr H Lalthlangliana chuan a office chamber-ah press mite a kawm a, check gate zawng zawngah screening tih vek a ni, tunah phei chuan home deptt-in permission a pek loh te chu tlangtir an ni tawh lo tih a sawi. DC chuan kawngpui pangngaia lolut te chu endik an niin lock down hi phelh pawh nise motor tam zawk screen vek thei turin ruahmanna siam a ni, a ti a. "Motor lo lut reng reng disinfectant (liquid chlorine) a kap vek thei turin Bairabi leh Vairengte-ah dah a ni a, chlorine hi tui tih thianghlimna atan hman mek a nih vangin eitur lam chi kah pawh a pawi lo a. Screening kalpui tawh chinah rinhlelh kai hmuh an la awm lo," a ti a. Essential Commodities phurtute chu a tul chin gate-ah an lo screen tawh tih sawiin mipui te chu kawng lakah ti ding kher lo tura ngenin an thlenna hmun thlen hmaa an kal char char hian a him zawk tih a sawi.

Dr. H.Lalthlangliana chuan mahni hna thawh emaw hlawhfa rawih tawh loh chuan eitur nghei mai a hlauhawm nia sawiin, hei vang hian hnathawk leh feh tura kalte in dan loh hram hram nise a ti a. Social Media-ah thu diklo a leng nasa nia sawiin, "Hei hian ramri ven kawngah min tibuai a. Hriatchian loh chu post lo ila, hriatchianah pawh mipui ti ralkhel thei a nih chuan thuneitute hriattir hmasak a tha a ni," a ti bawk.