October 11, 2022; Mizoramah dan hnuaia zu zawrh a nih chhung, 2015-16 atanga 2018-19 chhunga Excise & Narcotics department (END) in chhiah an hmuh chu Rs. 2,63,61,58,397 (vbc. 263.61) a tling a, hetihlai hian zu zawrh tihtawp a nih hnu 2019-20 atanga kumin 2022-23 (August ni 31 thleng) chhunga chhiah an hmuh chu Rs. 6,13,80,871 (vbc. 6.13) chauh a tling pha tawh.

Mizoramah kum 2014 khan Mizoram Liqour (Prohibition and Control) Act siam niin, January ni 15, 2015-ah hriattirna chhuah a ni a, March ni 16 atangin zu zawrhna dawr hawn tan a ni. 

Kum 2018 a MNF sawrkar a din hnuah, an tiam angin zu dawrte kharin zu khapna dan siam a ni a. Mizoram (Liquor Prohibition), Act chu March ni 20, 2019 ah Assembly House-ah pawm niin, zu khapna kalpuina tura duan, Mizoram Liquor (Prohibition) Draft Rules, 2022 rawtna chu, chief minister Zoramthanga hova thukhawm council of minister chuan kumin March ni 25 khan an pawm.

Dan hnuai a zu zawrh a nih lai, kum 2015-16 atanga kum 2018-19 inkar chhungin END te chhiah hmuh a tam tham hle a, chhiah hmuh beisei zat pawh hemi hun chhung hian kum tin Rs. Nuai 3,500 aia tam ni ziahin, Rs. vbc. 60 chuang hmuh ziah a ni thin.

Hetihlai hian zu zawrh khap a nih hnu 2019-20 atangin END chhiah hmuh nasa takin a tlahniam nghal a, hemi kum a chhiah hmuh beisei zat chu Rs. Nuai 5,940 la nimahse, hmuh zat erawh Rs. 2,72,73,718 chauh a tling a. Hemi hnu a kum tin a chhiah hmuh beisei zat chu kumin thlengin Rs. Nuai 100 niin, hmuh tlin loh kum te pawh a awm thin. 

END chhiah hmuh dan:
Kum    Beizat zat (lakh)    Hmuh zat
2015-16     Rs. 3567.82     Rs. 6053,37,738
2016-17    Rs. 4308.00    Rs. 7197,13,877
2017-18    Rs. 4308        Rs. 6568,58,696
2018-19    Rs. 5940        Rs. 6542,48,086
2019-20    Rs. 5940        Rs. 272,73,718
2020-21    Rs. 100        Rs. 96,50,853
2021-22    Rs. 100.00        Rs. 179,92,165
2022-23    Rs. 100.00        Rs. 64,64,135