Aizawl: Mizoram sawrkarin zu zawrh a tihtawp hnuah Aizawl khawpui daia zu zawrhna hmun hrang hrang ah te a hma aiin zu zawnga kal an tlem zawk a. Hetih lai hian zu man erawh a letin a to thung.

Excise & Narcotics Department thawktu te chuan Aizawl dai hnaiah chuan Rangvamual, Phunchawng, Tuirial leh Tuikhurhlu te chu zu awmna hmun deuh a ni tiin heng hmunah te hian theihtawpa hma an lak avangin pantu pawh an tlem tial tial niin Zalen palai an hrilh.

Tunlai rakzu tam zawk chu in atan a hlauhawm nia sawiin, "Tunlai rakzu tam ber hi tlanchhe chunga siam a ni a. Tun hma chuan zu hi dawidim hmangin buh hi zan 3 emaw tal up a ni thin a, tunah erawh chuan chhang siam ten an hman thin Instant Yeast hi zu chiah nan an hmang a. Yeast hian zan khat lekah a ti tho a, hetianga chiah zu in nasa ho hian nerve tha lo leh kal tha lo an nei nasa niin kan hria a ni," tiin Excise thawktute chuan an sawi bawk.

Thudawn danin tun hma chuan vawi 2/3 te chauh buh hi zu atan an thlawr laiin Yeast an hman hnu hi chuan an zu fe kha chini te pawlhin vawi 10 thleng te an thlawr nawn thin a. A chang chuan buh aiah chhangthawp te pawh zu thlawr nana hmang an awm nia thudawn a ni.

Rangvamuala zu zuar thenkhat te Zalen palaiin a kawmna ah tun hma aiin inhralh a har zawk niin an sawi a. Zu chu phalrai anih laia fun 2 Rs. 50 ni thin chu tunah fun 1 Rs. 50 a ni tawh tih an sawi a, whisky um 1 Rs. 350 man te pawh Rs.1000 ah tihsan a ni a, mahse a senchi hi hmuh tur a vang hle niin an sawi.

Tunhma lama kar tawpa zu in an tam thin chu tunah chuan an tlem tawh nia sawiin Excise in an thutchilh avang leh an check deuh reng vangin an neih chhun pawh an hralh ngam lo fo niin an sawi. Excise man chu an hlau hle nia sawiin, "In ngaihdam a awm lo a, fun 1 pawh min mansak se Court kan thlen ngei ngei thin avangin kan tan a hlauhawm hle a ni," tiin zu hralh thin pa pakhat chuan Zalen a hrilh bawk.

Excise & Narcotics thawktute chuan zu siam thin ten lei lai khuara zu an siam avang leh an thuhruk thiam avangin hmalak a buaithlak deuh tih an sawi a. Lei laikhuara zu bilh te chu tihchhiat a harsat avangin khawnvartui leh chi te an phul/leih thin niin an sawi. -

Rangvamual lamah zu in tlem mahse world bank kawng leh Durtlang kawng, Haflong ah te tunhma aiin zu in an tam nia an hriat thu Excise hotute chuan an sawi.