ZALEN August 20, 2025 : Zofa Welfare Organisation (ZWO) chuan Mizoram-a Jail te thawmthat a nih theihna turin April, 2022 khan High Court-ah PIL a thehlut a, he thubuai hi tum 49 ngaihtuah tawh niin order pawh vawi 49 pass a nih hnuah tunah hian District Jail thenkhat chu siamthat hna tan a ni tawh a ni.

He PIL hi Mizoram-a jail pakuate thuam that a nih theihna atan leh Mizoram Prison Manual 2017 hman a nih theihna atana thehluh a ni a, State Advisory Board leh Prison Development Board te pawh tihhlawhtlin nih ve rawh se tih a ni bawk.

Vawiina Aizawl Press CLU-a Press Conference an neih-ah ZWO Legal Adviser Rosalind L. Hmar sawi danin, He thubuai hi tum engemaw zat ngaihtuah a nih hnuah 07.08.2024 khan court chuanstate sawrkar atangin jail siamthat nan Crore 55 dawn a nih thu report a ni a, Addl. Advocate General chuan Gov't of India hnuaia Ministry of Finance, Department of Expenditure, Public Finance - State Division in Scheme for Special Assistance to States for Capital Investment (SASCI) Part -I hnuaia Capital Investment 2024-2025 atangin Mizoram tan Crore 275 a dah hnuaiah central jail leh jail dang 7 te tan Crore 55 a dawn tur thu report a ni.

06.09.2024 khan court-ah ngaihtuah chhunzawm a ni a, Hon'ble Chief Justice Mr Vijay Bishnoi chuan order khauh leh zual siamin Dt 02.09.2024-a sum hmuh tawh ni siin state sawrkar sawrkarin hmalakna pakhatmah a la nei lo a, paper-work chauh thawkin action lak a nih lo tih a sawichhuak a, ruahmanan felfai zawk ziamaa hna thawh hun tur chiang zawka court-ah thehlut turin leh hna thawh zawh hun tur chiang fek fawka report tuin thutlukna siam leh a ni.

High Court-a PIL ngaihtuah hnuhnun ber 16.07.2025-ah chuan Directors of Prison chuan Mizoram jail zawng zawng te survey zau zawk neiin Crore 36.30 chu Implementing Deparment i.e PWD hnenah 29.04.2025 khan pek a nih tawh thu leh contractor te thlan fel a nih tawh thu a sawi a, Court chuan fund pekna a rei ngaihtuahin hna a muan thu leh hnathawh mumal a awm loh cthu a sawi thung, thutkhawm leh turah chuan jail 8 te thawmthat leh siam that chin up-to-date thehlut turin thutlukna a siam a ni.

11.06.2025 -a State Sawrkar Additional Affidavit-ah chuan Central Jail, District jail pathum - Kolasib, Serchhip, Saitual-ah te hnathawh tan a la ni lo a, DJ Lunglei, DJ, Siaha, DJ Champhai leh DJ Mamit-ah te chuan hnathawh tan a ni.