A hmasa in inbuatsaihna a tha tawk tih a chiang a, eng­kim mai kha a bu ang thlap a ni. A hnar kaitu ber Director, Art & Culture Deptt. leh a kaihhruai a naute thawhrah a ropui takzet. Tin, Central YMA hruaitu te, khawpui chhung YMA Branch hrang hrang te leh MHIP te inpekna kha Chapchar kut hlawhtlinna laimu niin a chiang reng mai.

Tunlai khawvel ah chuan mipui huapa hlawhtling taka programme kalpui tur chuan sound system tha hi a pawimawh em avangin world class sound system chhawp chhuaktu ‘Active Sound’ te sawi lan loh theih an nilo bawk. India ram pum huapah pawh ni se local programme bik ah ngat phei chuan khatiang aia tha sound kha vawrh chhuah a la nih bik a rinawm loh.   

Lammual chhung mai nilo, Aizawl tlangdung tluana mipui Kut chhim pungkhawm mawlh kha  hmuh an nuamin an chezia leh hawiher ah ‘Zonun Zemawi’ a lang chiang hle chu a nih kha. (Kut fighter an tih te ang kha chu khawvel hmun dangah pawh hian an awm ve nawk a nia, a ti kimtu ah ngai mai zel ila). Tin, mi thenkhat thil reng reng sawisel tur chan a chang, YMA nula tlangval te zai leh rimawi fawn vel kar a hlim tak a an che vel zurui hmuha hmuh phet ching ho pawh an beidawng ta deuh nge ni, khatianga sawi thawm thangva pawh a reh ta hle mai. 

Sawi lan loh theih loh chu kan Kut Pa- Chief Minister thusawi mawlh mai kha ngaihthlak a nuam­in Chapchar Kut a sawi awm hlir kha a sawi a, a hun leh hmun mila  thusawi ropui ber a ni chiang bal mai. Tin, Kut Pa leh Kut Thlengtu te Chief Minister leh Art & Culture Deptt. changtu Minister ten Mizo diar khim dan dik taka an rawn khim kha an va fakawm em. Assamese diar khim dan anga diar hmawr beng kawma pawh thlak zul ang nilo diar hmawr beng chunga bilh luh ngatin diar an rawn khim a ni. (Diar hi Pipu hunah khan inhliam palh pawha hman tangkai theih tur khawpa sei tha an khim thin a. Tunlaia tangphel emaw lek diar kan khim hi chu a ho lam deuh chu a ni, inzawn a ngaih pawha hman theih tur khawpa hlam hniha sei tal diar hi an lo khim thin)   

Cheraw a ruala kan mup mup kha a ropui a, a mawi tak zet. Kum 2010 a World Record siamna atana cheraw  kan a nih dawn khan Upa lam tan pawh a awlsam zawk na atan a step har deuh ho kha telh a nilo a, kha mi World Record a Cheraw kan kan ang khan tun thleng pawh hian kan la kalpui ta niin ka hria. Tunlai ah YMA nula ho hlirin Cheraw an kan a, a step kim a kan leh hi ni thei se a hlutna a famkim lehzual ngei ang. 

Tin, kan thlang tlak hma khan buhza aih nan Cheraw an lo kan thin a. Cheraw khawn rem khan "Cheraw tlawh tlawh" tiin an au dual dual thin a. Tunlai Chapchar Kut ah pawh hian Cheraw a hu ho a  kan a nih hian a khawngtu te hi lo au rual ve dual dual in darbu, darkhuang, khuang, seki leh  chhepchher hmang te hian Cheraw khawn milin rimawi lo rem tluk tluk bawk se kan Cheraw kan hi nasa takin a ti ropui lehzual ngei ang.

Mipui te chanvo a tam zual nan ‘Chheih Zai’ hi a zawnin mipa leh hmeichhia in hla pakhat ve ve sa thin ta se… Chheih Lam thiam te mual lai bial hrang hranga lam te tan hun tam zawk pek hi kut ti ropui lehzual tu a nih ngei a rin­awm. 

Muala lemchan Theatre Arts lam kan telh thin hi chu tih fo loh a tha maithei. A changtute an thiam teh reng nen an hlutna kan tih nep sak in an khawngaihthlak zawk alawm le. Hall chhunga inkhar khip a sound leh light effects te nena urhsun taka en chi  a ni si a. Tin, hetiang ground drama ‘Khuangchawi’, ‘Mizawn Inchuh’, ‘Kut Rorel’, ‘Pawnto’ ang chi leh Mizo infiamna chi hrang hrang te hi chu tih nun zel a tha reng. Tin, Mizo Sairawkherh (Rawngul leh Sairil hmanga siam) hmanga in perh siak hi telh thin ni se la, thangthar te hmuha hmelhriat tir leh hi a fuh maithei bawk. 

Mizo pipu te lam lo neih ho hi a hlu in, hnam dang lakah pawh a chhuanawm hle thin a. India hnam hrang hrang ho lam dan hi chu sakhuana leh an eizawnna lam kaihhnawih hi an lam leh zai ah hian a tel nual a, Mizo hnam lam erawh hi chu a hrang hlauh hian a awm a. Central sawrkar pawh hian kan hnam lam te hi a ngai pawimawh hle ni tur a ni, India aiawhin Mizo hnam lam te hi ram pawna entir turin thlan chhuah a lo ni tawh thin a ni. Tun hnua tu te emaw tih dan la a hlo thlawh lam entir kha chu a fuh berin a lang lo. Tin, Hmar hi Mizo hnam pakhat a ni a, hnam hrang ang maia a hrang a hraia "Hmar lam" han tih kha a fuh ber lo maithei, comment na lamah ah te “Mizo chipeng pakhat hmar hnam lo chin thin a ni a" tih ni mai ta se. Tin, laipui sira LED screen lian tha tak hmanga programme pek chhuah kha Kut boruak siamtu leh ti ropui tu a ni ngei mai. Amaherawhchu, ni eng chhun loh zawngin Vanapa Hall bathlar chungah hun ni ta zawk se a fuh zawk mahna. 

Tin, North East Zone Cultural Centre (NEZCC) kaltlanga State dang lamthiam lo kal te kha lo sawisel pawl hi an awm thin a, NEZCC hi sumpaia min rawn tuam­hlawm tu te an nih thin mai bakah kan Kut min rawn hmanpui hi a lawmawm zawk hle a ni lo a mi?  

Tin, Chapchar Kut hi ban tlai pawh inhuamin mualah hian ni khat hman mai ni ta se. Hemi hian a ni khatna a chanvo nei te tan urlawkna ang chauha ngaihna lian tak hi nasa takin a su kiang anga. Programme dang pawh zanah huaihawt a ni fo a, harsatna kan tawk ngai lem lo chu a nih hi. ‘No Vehicle Zone’ ah puangin Muala tih chi zawng khaw en laia zawh fel hnu ah tlaiah Kut ruai te huaihawtin kan local catering te tan sumdawnna huang zauhna remchanng tak kan siam sak theih phah bawk anga. Zan lamah concert lamin han chhunzawm ta mai se kum khata vawi khat thil thleng kan Mizo kut ropui ber a nih manah te pawh.

Kan Chapchar kut hmanna pui ber hi kawng danga sawi lo hian ‘Lammual’ tih hi ni tawh mai se. Tin, Mizoram mipui te duh ber Mizo hnam in pumkhatna atan he Kut hi hman ni thei se hmun danga Mizo pawl hrang hrang te hi Official in sawm ni thin bawk se. Tin, kum danga kan hmuh zen zen loh a ruala ‘Tlanglam’ kan hmu ta kha a lawmawm in a ropui a ni. Kohhran rilrem loh hlauh avanga Tlanglam runpui kan lam ngam ngai loh kan han lam ta kha hmasawnna ropui tak a tih theih awm e.

A tawp berah chuan khati zat programme hrang hrang tluang taka a hlawhtlin vek theih na atana huang chhung tin luh­chhuak vek peih Pi Carol VLMS Dawngkimi, Director, Art & Culture Deptt. leh amah thlawptu a thawhpui te inpek na avang liau liau a kha Kut hlu tak kha hmang thei kan ni.