Zawhna: Anxiety natna hi engtiangin nge a lanchhuah a, hna a thawh? Thaw-i-pik, hlauhthawnna leh dawih­na te hi Anxiety hnathawh a ni thei em? Anxiety natna hi enkawl dam theih a ni em?

Chhanna: Anxiety han tih hian Mizo tawng chuan rilru kaptu, delh rittu, vei neih run tihna a ni ber awm e. Hetiang hi mihring kan nih chhung chuan kan tawn vek emaw tawn vek tur a ni kan ti thei ang. Zirlaiin exam a neih dawn te, damlohna inentir hmachhawn mek te, hnalak interview hmachhawn tur te, chi hrang hrangin hetiang anxiety hi kan nunah a thleng vek awm e. Mihring kan in an loh vangin kan dawnsawn dan pawh a in ang kher lovang.

I rawn zawh tak erawh hi chu Anxiety disorder kan tih, rilru lam problem chi khat, common tak a ni. Mi hrisel tha pangngai tak, zuk leh hmuam pawh ti ngai lo, in fit tak, infiammi te pawhin an neih fo a ni a, enkawl ngai a ni. A lan chhuah dan pawh a chunga kan sawi rilru kaptu, delh rittu, vei nei tlat ang hian a awm thei a. A danglamna erawh nitin khawsak leh nunphung ti buai khawpin a thawk thung a ni.

A lan chhuah dan common zual panga te chu – awm hle hle thei lo, ho te te a thinrim, chau hma riau, thil dang ngaihtuah hlei thei lo, mut harsat emaw kham khawpa mu thei lo, taksa kham them thum, tihrawl rawl them thum ang te a ni. A thenah chuan thaw kham lo te, pum/dul sil thum ang te pawhin a thawk thei bawk. Khumbet emaw pawn chhuah harsa khawpa natna ni mang si lo, mahse nunphung ti khaihlak leh ti buai thei em em a ni.

He anxiety disorder nei tam zawk hian enkawlna an dawng lawk lo thin a, a chhan pawh doctor te han inentirna tur khawpa harsatna ni chiah si lova an hriat vang a ni fo thin. |henkhat erawhchu damlohna nei tlata inhriatna an neih vangin doctor chi hrang hrang an rawn kual fo thin. Ek mumal lo te a thlen ve fo avang leh, pum lawng (gastritis) anga insawiselna te an neih duh vangin chutiang atan chuan doctor te an pan fo thin a ni.

I rawn sawi thaw-i-pik, hlauhthawnna leh dawihna te pawh hi a lan chhuah dan ani fo. Rilru lamah fel lohna awm tur anga inngai chiah si lo, rilru lam mithiam (Psychiatrist, Psychologist) te han pan hreh lawi si an nih thin avangin enkawlna dik an dawng lo fo thin a ni. Mental disorder anih miau avangin Psychiatrist emaw Psychologist te enkawl mamawh an ni a, counselling emaw damdawi hmanga enkawl ngai an ni.

Enkawl dam theih chu a ni teh meuh mai a. Enkawlna dik an dawn a pawimawh a, a zual tak tak hmaa enkawl an mamawh thin bawk. Kan society ah hian rilru lam fel lohna nei tur anga kan inhmuh dawn chuan mi rilru kim lo anga inhmuh kan ching a, chumi ni thei tur chuan kan inpawm thin si loh avangin a enkawltu tur tak Psychiatrist emaw Psychologist te kan pan hreh fo thin a ni.

A enkawl dan kan sawi tak ang hian a nasa lovah chuan counselling hmang te pawhin a enkawl dam mai thei a. A lo rei tawh emaw a nasa anih erawh chuan damdawi hmang ngeia enkawl ngai an ni thin bawk. Mahse kan hriat tur chu damdawi hmanga enkawl an nih chuan doctor te chawh ang thlap thlap a treatment an lak a pawimawh a. Hmasawn lo nia an inhriat pawhin midang rawn mai lovin an inentirna doctor ngei pan leh kha a pawimawh a ni.