Luangliam

Birthday Ka Làwm Nawn Awn Awn Mai!

Zirsangkima - Nov 02, 2022

Thil chhinchhiah tlâk tak chu, he Lehkhabu Pho Rùnpui hawn ní-a lehkhabu 31 lai mai tlángzarh a ni kha a ni. He thil hi a namai lo a, thil namén a ni lo! Mizorama a ruala lehkhabu tlángzarh tam ber tum a ni chiang a. Tum luiha record siam pawh MWA hi a ni lo. Chu aia ropui zâwka ka hriata chu, khawvêl pum huap pawha a ruala lehkhabu tlángzarh tam ber tum nia a lang hi a ni.

October 25—29 chhúng khán Mizoram Writers Association (MWA) chuan Mizo ziak mite pualin, ‘Lehkhabu Pho Chhuah Rùnpui’ Vana Pa Hall-ah an buatsaih a. Ziak mi 300 chuangten an kut chhuak an pho chhuak. Kei, anni zínga âk zât hnih pawhin a ngam zân tùr paw’n ka pho chhuak ve a; a sa huai lo ber kawltu hian nuam ka ti ber ang lawi a! Nuam ka tihzia mai chu, he lehkhabu kût buatsaih chhúng zawng hian ni tin birthday ka làwm nawn awn awn ni berin ka inhria!

A buatsaihtuten, ‘Keini ziak mite hi chuan hêtiang bâka intih hlimna dang kan nei ve chuang lo, picnic leh thil dang tih vêl aiin nuam kan ti zâwk!’ an ti mathlâwn loin ziak mite hlimna tùr leh hlâwkna tùr ngaihtuahin an inséngso a. Sorkar puihna phût miah loin hun, tha leh zung an séng a. A zárzotute chu ziak mite mai ni loin a man tláwma lehkhabu leitu mipuite an ni. MWA hruaitute, fakin awm rawh se!

Lehkhabu ziaktute kut chhuak, bu sãng dáwn mai chin fel, chhinchhiah, dah fel, a zuartute thutna tùr ruahmansak, hralh chhuah zât ni tina ziah fel, lehkhabu zuar hman lote a thlàwna lo zawrhsak zawng zawng chu MWA hruaitute hna a ni vek mai a! Ziak mite lehkhabu hralhna atangin deré pawh an phût lo lehzêl! Hei lo liama lehkhabu ziaktute tána picnic! Chhîp chen bawp khaia chibai bûk an phú hliah hliah a nia!

Dik tak chuan Mizo ziak mite hi inti theia han chapo zia hi kan va’n ni hlawm lo tak! Kan tui ve si a, kan rethei bawk si! Kan hralh thei bawk si lo! Rilru, hun leh tha séngin lehkhabu kan han ziak ve a, bá-a min chhutsak duhtu kan zawng a. Kan hmuh mial hnu leh an chhut zawh hnuah kan lehkhabu chu press atangin kan la chhuak a. A ziaktu berte hi lehkhabu pu kual pùr pùrtu kan ni zui a. Mahse, nuam hi kan ti riau tlat tho! A mak tak tak a nia!

Lehkhabu tlángzarh dàn tùr ngaihtuah zui a ngai. Hall hman man, zai thiam sàwm man, ei leh in man … Man nei vek—chu chu, ‘Bat ngai vek,’ tihna! Kan ngaihtuah ber thin zâwka chu, ‘A bá-a mawihnai angreng fú-a tlángzarh dàn tùr,’ a ni zâwk mah!

‘Tlángzarh zawhah kan mi sàwmten lehkhabu an lei nghâl dáwn a (‘A man tláwmin,’ tih chu sawi lan chi a ni lo!); chumi atang chuan kan inrùl dáwn nia,’ tiin a bá-a tlingtlâk theih dàn tùr kan ngaihtuah ta thin a. Mizo rilru pua tlàwmngaih min chhuahsak thei kan han hmu ta hlauh thin hi chu, kan lãwm thin teh a nia.

Kan lehkhabu, mite lei theih tùra dàwra sem hlàn nghâkhlel ber kha kan ni miau si a. Tlángzarh zawh rualin, nalh ve angreng taka inchei chungin lehkhabu dàwr leh bookram hrang hrangah mahni lehkhabu ziah kan han zuar kual zui zat a. Ni e, kan pu kual pùr pùr zêl! Zak thei kan ni lo! Lehkhabu zuarten an dàwra lo pho ve man, chéng za-a chéng 20 min lo eisak pawh ná ti thei kan ni lo hrim hrim! |hiante hnêna, ‘Chumi khami dàwrah chuan va lei rawh u,’ han tih vêl te leh WhatsApp status-a lehkhabu min zawrhsaktute dàwr hming leh address han tàr chhuahte kha nuam kan ti êm êm mai a. Hei vàng hi nge maw ni dáwn ni, lehkhabu dàwr neitute hian dàwr fakna an siam ngai ka hre miah lo!

Kár eng emaw zât liam hnuah, note bu tê nèna ba khawntu kan ni leh a. Hmél hriat, lehkhabu chhiar ngai miah lo pawh hnawna lei luihtír thintu pawh keini tho hi kan ni! Kan hralh bãng in lama hàwn hnù hnùa, chhúngte laka inthlahrung zeta bang kil ãwl lai emaw kudâm kil ãwl, thirtiang intìanna sír hmu mawi thar thut fo thintu pawh kan ni! Hausak lam chu a la hla a nia!

Mahse, nuam kan la ti fan tho—chutia awm chu! Kan kut chhuak lehkhabu hi, a tha emaw tha lo emaw, a hmél a tha emaw tha lo emaw, miten an fak emaw an sêl emaw, kan ríla rah, kan hrin, kan kut chhuak a ni a, rethei takin kan lungawipui thei tlat a nia…

He rilru, ziak mitea awm bawk kha, MWA hian a hre reng a. Páwl sum séngin ziak mite hamthat nán tiin he Lehkhabu Pho Chhuah Rùnpui hi an buatsaih ta a, ni khat dang an pawt sei hial!

Chutah zet chuan le! Lehkhabu lei tùr hrim hrimin Vana Pa Hall-ah mipui, nu leh nau, zirlai leh zirtirtu, ukil leh jail táng chhuakte bâkah tui búr heh ve takte leh mi chi hrang hrang an rawn pung khâwm ta chiam a le! ‘Lehkhabu |ial King’ te pawt ta loa keini ziah ve an han pawt fu chata, lei mai duh tâwk loa kan hming ziakte min han díl a … a! thlá hial hial lâkpuia min han sáwm leh ta zêl han tawn hi chu—a ropui dàn chu sáng tak a ni! Kár tluanin birthday ka làwm nawn awn awn mai ni berin ka inhria!

Thil chhinchhiah tlâk tak chu, he Lehkhabu Pho Rùnpui hawn ní-a lehkhabu 31 lai mai tlángzarh a ni kha a ni. He thil hi a namai lo a, thil namén a ni lo! Mizorama a ruala lehkhabu tlángzarh tam ber tum a ni chiang a. Tum luiha record siam pawh MWA hi a ni lo. Chu aia ropui zâwka ka hriata chu, khawvêl pum huap pawha a ruala lehkhabu tlángzarh tam ber tum nia a lang hi a ni.

Hei hi kan sorkar pawh hian hria se ka ti hle mai. Sum tam tak sénga eng eng emaw hmanga record siam tum ai chuan, sorkar ti buai miah loa record siama inngaite ngaihsak hi a va pawimawh zâwk dáwn êm! An record siamna lah hi, kan hnam, kan tû leh fate tána ro tling a ni lehnghâl bawk si a…

Lehkhabu Pho Rùnpui, ziak mite kûtpui chu a’n tiak ta a. Tùn kár chho chu khua a har vawng vawng dáwn mang e!

Share now