Zawhna: Ka pu, nu kum 48 mi, pasal fanau nei ka ni a, ka thi a la hul lo bawk. Kan fa te ber ka neih atang hian zunthlum ka nei ta tlat mai a, a tirah chuan ei leh inte ka han fimkhur ve deuh a; mahse, doctor-in damdawi min chawh takah chuan ka ei ta reng mai a, kum nga lai chu damdawi hi ka ei ve ta. Tun hnai hian ka blood sugar hi ka control tha lo nge a sang zauh zauh mai a, inchiu ve tawh mai turin doctor-in min ti a. Ka huphurh nen, ei leh in lam ka insum ta vak mai a, ka chau ngawih ngawih mai zel a. Engtia tih chi nge ni ang? Inchiu hi chuan dam chhung a ngai tawh an ti si a, min puih theih chuan ka lawm ngawt ang.

Chhanna: Zunthlum natna kan tih hi medical term chuan Diabetes Mellitus an ti a. Taksaah thlum (sugar) a tam avang leh chumi chu sem darh tur leh chawk tê tura taksa khawlin hna a thawh that loh avanga lo awm thin a ni ber. Kan taksa hian sugar (chini anga ngaih loh tur) hi chaw atan a mamawh ber pawl a ni a, thluak hnathawh atan phei chuan a pawimawh em em a ni. Kan thil ei zinga sugar (carbohydrates) ni lo thil dang fats leh protein te pawh hi taksain a mamawh dan azirin thlumah a insiam leh thei bawk. Kan taksaa sugar lut chu kan mamawh dan anga sem ral turin hormones pawimawh tak mai, Insulin a awm a, he hormones hi kan organ zinga mi, Pancreas chuan a siam thin a ni.

Zunthlum natna lo awm chhan chu kan taksaah sugar sem leh chawk darh tur Insulin-in hna a thawh mumal theih loh emaw, pancreas buai vanga insulin a insiam that theih loh vang emaw a ni thin a. Chutiang chu Diabetes Type II an ti a, Type I-ah erawh chuan kan taksa vengtuten kan pancreas-a insulin siamtu cells an tihchhiat vang (auto-immune disease)-in insulin a insiam thei lo thung. Type I hi inthlahchhawn a ni deuh ber a; tin, Type II pawh hi inthlahchhawn awl tak a ni bawk. Chutiang avang chuan nu leh pate zunthlum nei an awm chuan an faten an neih vena chance hi chhungkaw dang zunthlum nei ve lo aiin a sang zawk thin a ni. Tin, nau pai hian zunthlum hi a trigger ve leh thei bawk a, chu chu Gestational Diabetes an ti a, nau an neih hnuah an sugar hi a tam zawk chu a normal ve leh mai a, thenkhat erawh chuan zunthlum an nei chhunzawm ve thei bawk.

Zunthlum neite hi a tirah chuan ei leh in in-control bakah exercise hmangin enkawlna pek hmasak phawt an ni thin a. Chuti chung pawha a la ziaawm theih loh chuan damdawi an chawh leh a. Damdawi ei chi ngawta enkawl hi a tawk lo va, ei leh in control leh exercise regular taka lak a pawimawh. Damdawi ei hian sugar a control tha leh tha lo en nan Glycosylated Hemoglobin (HbA1c) an test-tir thin a, hei hian thla thum chhunga an blood sugar control dan a en a, a control that loh chuan damdawi thlak danglam emaw, Insulin injection te an chawh ta thin a ni. Insulin injection an mamawh tawh hi chuan lak ngei a tha a, dam chhung lo ngai ta pawh nise him dam taka awm phahna a nih chuan a tha tho tho. Chutih rualin thau zual paih a inlak fit hian Pancreas hian insulin a rawn siam tha ve leh thei bawk a, insulin lak ngai lovin damdawi ei chia let leh pawh an awm thei bawk.

Zunthlum neih hian kan taksain nutrition (chaw tha) a mamawhna a la ngai reng a, insum nasat lutuk khan taksa mamawh zat chaw kan la lut lo va, taksa chau a lo awm thei ta reng a ni. Chutiang avang chuan ei leh inah pawh awmze neia lak a pawimawh hle ang. Vawi khata ei chiam aiin ni khat mamawh hi sem zai a, darkar hnih dan vel lek leka tlem tetea ei pawh taksain a dawngsawng thiam zawk dawn a ni. Kan chaw ei pangngai hi a tha tawk viau a, sugar tam lakluh inven nan chaw tui thlit te, rice aiah Oats ei te, atta ei te hi a tangkai thei a. Thlai hring leh thei lam ei tamte pawh a tangkai thei. Hetiang atan hian Dietician thiam tak tak kan nei a, lo rawn thei la i tangkaipui ngei ka ring. Sugar in-monitor uluk a pawimawh a, mahnia in-test-na, Glucometer nei ngei thei la a tha bawk ang.