Dr Ka Zawhna

Candida chanchin hi min hrilh theih chuan ka lawm hle ang. Chuan, HIV negative ka ni e.

Dr. Chawnglungmuana - Aug 22, 2021

Candida Albicans-in a thlen Candidiasis vangin a awm duh hle

Zawhna: Ka pu, khawngaihin ka zawhna hi min hrilhfiah theih chuan ka lawm hle ang. Pa kum 72 ka ni a, kum 23 kalta kum 1997 khan Balanitis infection ka nei a, doctor rawnin treatment ka la a, a ziaawm deuh a; mahse, a dam tak tak thei lo, a rawn lang leh thin. Nikum khan pumpui lawng leh chawkawng lawng ang deuh hian ka awm a, Endoscopy ka ti a, Oesophagus Candidiasis min ti a, Fluconazole kar thum ka ei hnuah kumin February khan Endoscope ka ti nawn leh a, a tha an ti a. Engati nge Candida hi recurrence a awm tam em em? A dam hlen thei em? Candida chanchin hi min hrilh theih chuan ka lawm hle ang. Chuan, HIV negative ka ni e.

Chhanna: I zawhna hi a chipchiar tha hle mai a, hetiang hian doctor hnena kan inentir pawhin sawi chipchiar thei ila, a lo entu doctor tan pawh a natna dik hriat a awlsam ang a, a enkawl dan pawh a awlsam phah ngei ang. Chuan a hmasa berah chuan Balanitis i rawn tih hi chhiartute tan han sawifiah hmasa ila. Mipa sazu hmawr lik kan tih (Glans penis), chumi lai vung emaw pilh leh na awm chu a ni. Balanitis hi a chhan hrang hrang a awm a, vun lam dik lohna te, hygiene lama hniam te (hetah hian sazu hmawr silfai ngai lo, lipa tifai ngai loah te a awm duh zual), sex hman kawngah hmeichhia a inpeih hmaa sazu thun mai te (hmeichhia an inpeih loh chuan an serh tuihnang a awm hman lo va, serh pilh/vung a awm duh thin, mipa leh hmeichhiaah pilh/vung hi a awm thei ve ve) a ni a; tin, zunthlum nei te hian an nei duh hle. Immune system chak tawk lo (entir nan, HIV+ te hi) te hian an nei duh viau bawk.

Balanitis hi fungal infection chi khat i rawn sawi, Candida Albicans-in a thlen Candidiasis vangin a awm duh hle bawk a, chu chu immune system chak lote leh zunthlum neite hian an nei duh zual bawk. Candidiasis hi hrawk leh chawkawngah a awm duh phian bawk a, kan sawi tak zunthlum nei leh HIV+ te hian an nei duh zual bawk. Zunthlum (Diabetes) hian nerve a khawih chuan pilh leh vung avanga na kan hriat tur hi a tichawmawlh thin a, hriat loh karah infection a lo awm duh bik a; tin, immune system pawh a chak lo fo thin a ni. Chuvangin, zunthlum i neih leh neih loh i sawi lo va, i la in-check ngai lo a nih chuan Blood Sugar  Fasting leh PP lo test ngei thei la a tha hle mai.

Fungal infection hi chi hrang hrang a awm ve a, chung zinga a common zual zingah chuan Ringworm hi a ni awm e. Heng fungus te hian hmun hnawng leh biru lai an khawih duh bik a; tin, a tam zawk hi taksa immune system (natna dotu) chak tawh lote hian an neih duh avangin taksa chak tawh lo remchanga la a hri thlentu an nih thin vangin Opportunistic infections tite pawhin an sawi fo thin a ni. Candidiasis thlentu Candida Albicans hi kan taksa chhung leh pawnahte an awm reng a, a hranpa chuan natna an thlen lem lo. Mahse, kan sawi tak angin taksa a chak loh te, a fai tawk lohte khan hri natna ang kha an rawn thlen mai thin a ni. Chutiang avang chuan taksa chak lo, immune system tha tawk lo, entir nan transplant patient (kidney, liver etc) te, cancer chemotherapy la laiah te, natna thenkhat enkawlna atana steroid ei laiah te, HIV+ te leh Zunthlum neiahte hian a awm duh zual.

Taksa chak lo emaw inenkawl fai tawk lovahte a awm duh avang hian an kai laklawh chuan a reh mawh duh viau mai a, taksa tichaka hygiene lama hmasawn a pawimawh viau. Zunthlum nei ah phei chuan control tha tawk lo te hian an nei duh hle a, chuvangin in monitor uluk a pawimah hle ang. A enkawlna antifungal damdawi (i rawn sawi zinga mi Fluconazole te) hmanga enkawl that chuan a dam hlen ve fo bawk. Hygiene maintain uluk hi a pawimawh hle mai a, thawmhnaw ro tha tawk lo hak te, insilfai lam inthlahdah te hian fungal infection hi a awm duh zual avangin personal hygiene maintain that hi a pawimawh em em a ni.

Share now