Mi ropuite ze ropui tak pakhat (nia ka hriat) chu  dawhtheihna/teireipeihna hi a ni. Mi hmanhmawh, mi ti thawt thawt, mi chi ai sam leh dawhtheihna tlachham tak te hi an thleng sang mawh khawpin ka hria.

Bible-a Pathian mi ropui tak tak kan hmuh te pawh kha dawhtheihna ngah tak an ni a, an teirei peih em em bawk. Nova teirei peih zia te kha kan ngaihtuah ngai em? Pathianin vawi khat chiah lawng tuk turin a hrilh a, a hrilh nawn fo lo. Amaherawhchu, Nova chu a vawikhat aw hriatah khan a ding nghet a, kum za chhung teh meuh Lawng a tuk ngat ngat mai a ni. Nova kha keini anga mi beidawng hma chu nise, kum za chhung khan vawi sawmpathum hmun sawmpathum a beidawng hman hial awm a sin. Kum za chhung khan vawi khat mah pawltharna a dawng lo a, Pathian lahin a be nawn tawh hek lo. Chuti chung chuan a dingnghet tlat a, dawhthei takin Pathian thutiam lo thleng tur chu a nghak a, lawng a tuk ngut ngut mai a ni.

Pathian hnam thlan Israel te pawh kha hnam phunchhiar tak, dawhtheihna tlachham tak an ni. Ramtiam Kannan an pan lai khan Pathianin thil ropui tak a tih sak thin a, Tuipuisenah a hruai kai a, thlalerah manna leh vahmimin a chawm a, lungpui ata tui in tur a ti chhuak a, zanah mei alh leh chhunah chhum dingin an hma a hruai sak a. Khati chung khan an phun an phun a, enge maw hlekah an vui vai a, a changin hruaitu Mosia chu lunga denhlum an tum thul. Sinai tlanga Mosia’n Pathian dan thuthlung a han lak a, ni 40 lek a thang bo hlan pawh khan an lo hel hman a, Arona hovin rangkachak sebawng an din a, pathian angin an be mep mep a, Pathianin thil ropui tak a tih sak tawh zawng zawng te chu ni reilote chhungin an theihnghilh hmin der mai!

Dawhtheihna tlachham lutuk chuan mi huat an hlawh phah fo a, mi hmanhawh, mi ti thawt thawt chuan an dai pelh nge nge thin. Kan nghah fan fan a, kan dawhtheihnain a tlin tawh loh lek lek hnuah hian tlem han in pawt fan leh hlek ila, a tha zawngin boruak a in her leh mai thin. Israel lal Saula pawh khan Philistia mite nena an indo dawn tum khan Gilgal tlangah Samuel-a kha a nghak fan fan a, ni sarih a nghah hnuah pawh Samuel-a chu a lo lang thei si lo. Chutih laiin an hmelmate chu an mahni do turin an in hawrkhawm mup mup tawh mai si. Saula mangang, hmanhmawh tawh bawk si chuan puithiam te chauhin an hlan tur halral thil hlan chu a lo hlan ta mai a! A hlan zo chauh a, puithiam Samuel-a chu a lo thleng leh ta si, a pawi zo ta a ni. Saula khan a nghak ta sa sa, a dawh thei ta sa sa, minute hnih khat lek han nghak leh hlek se tha mai tur.

Keini mizote hi hnam dawhthei tak, teirei peih tak hnam tia sawi tur kan ni ve em? Kan ni chiah lo mai thei. Zawi te tea a tahtawla tih bek bek ai chuan vawi lehkhata tih thut, zawh thut, tlingtlak thut hi kan rilrem zawng a ni a, zan hnih khat thil thua hausak thut, kum khat chhunga a hlawkna tel nghal thut, exam dawn hnaiha zir thut hi kan duh dan a ni a, kan teirei peih lo a, kan nghak peih na hek lo. Hmathlir thui tak, nakina ram leh hnam tana tha tur ai chuan tun dinhmuna kan puar pui tur, a hlawkna kan tel theih nghal tur hi kan ngaihven zawk a, kan thinlungah a tla na zawk bawk. Heng te vang hi a ni ta ve ang, kan ramah hian ‘sem policy’ hi mipui thinlungah a tlak nat em em thin ni. Nakumah pawh kan inthlang leh mah ang a, tun atanga kum 10, kum 20 hnua ram leh hnam tana tha tur, long term policy ai chuan chawpchilha kan hlawkpui nghal tur policy hi a hralh a kal leh zawk ngei ngei ang.

Tisa thil chang ni lo, thlarau lam thilah pawh malsawmna dawng tur chuan dawhtheihna a pawimawh tho mai. Rinna Pa ti hial sawi Abrahama kha dawhthei hle lo se khatiang dinhmun ropui kha a luah zo kher lo ang. Pathianin a koh khan thuawih takin, kalna lam tur pawh hre loin a chhuak ve tawp a, a vahvaih chhung kum tam takah khan Pathian aw a hre khat teh a sin. Revival kha a dawng chhang khat khawp mai. Khati chung khan a ding nghet a, a dawhthei a, a teirei peih a, a tawpah malsawmna tam tak a dawng ta a ni. Keini, darkar khat inkhawm pawh rei ti a, tlin mang lo te nen chuan kan kar a hla hle mai.

Abrahama te, Nova te ang lo takin keini chu kum khat danah gospel camping hmanga renew ziah kan ngai a, camping a luh kan sam a, inhlanthar lah kan awlsam. ‘Tun tum zet chu a va fuh em’ kan ti a, ropui takin testimony kan sawi a, kan ngheh hmel thin khawp mai. Amaherawhchu, ni leh thla a liam a, kum a vei meuh chuan chiangkuang takin kan da leh a, a ngai tein bul tan that kan ngai leh thin.

Dawhtheihna leh teirei peihna hi mimal leh hnam anga kan ze ropui ni thei se a va tha dawn em!