Zawhna: Ka pu, nula kum 27 ka ni a, nikum khan ka mit (gall-bladder) paih a ni a. Tichuan, tunlai hian ka hmai a rawn bawl vak mai a, doctor ka pan a, damdawi min chawh hi antibiotic a nih vang nge maw ni ka ei atang hian ka thin zawn vel hi a hah/chau thin a, ni tam ka ei hman lo; ka ei loh chuan ka insawisel meuh lo. Hmai bawl loh ka duh si a, damdawi ka eiin ka nawm loh phah zel bawk si, min pui hram teh. Pumpui chakna te ei tel ila a ziaawm phah ang em?

Chhanna: Mit (Gallbladder) hi a tangkaina lai ber chu kan thil ei leh in lo thial sawm (digest) tura thin (liver) atanga inseam bile tui khawlkhawmna a ni a, thil kan ei khan kan mit chu a lo sangmar a, he bile hi pumpui leh ril te intanna laia kan thil ei lo digest turin a rawn nawr chhuak ta thin a ni. Bile hi a bik takin kan thil ei a thau lam chi (fats) digest tura puitu ber a ni. Mit paih anih hnu hian chu function chu kan thin hian a kengkawh thei mai tho nachungin thau leh mawm lam chi ei tam hian pum nuam lo, acid leh gas insiam tam te, pum puar leh hnawh, ek khal emaw, kawthalo emaw a awm ve thei a ni.
Mit paih i ni chungin i insawiselna hi i hmai bawl vanga damdawi i ei side effect a nih duh hmel ta ber a. Antibiotic lam chi hi pum chak lo chuan an zo lo fo mai. Antibiotic hi chi hrang tam tak a awm a, a chak zual deuhte phei chu hrisel tha pangngaiah pawh lu a tihai fo a, a then chuan i rawn insawisel ang pum nuam lo, luak chhuak leh chau nghulh angte hi an nei thin a ni. Chutih rual chuan antibiotic hi hrik thahna atana hman a ni a, infection eng emaw i neih avanga i hmai bawl siamtu hrik tihlum tura an chawh che tihna a nih hmel a. I ei tawh laklawh chuan a course ang chu i ei zawh ngei a tha a, chuvang chuan i insawiselna pawh hi i doctor inentir hnenah chuan hrilh leh ngei phawt la a tha ber. Pum chak lo vang chuan a awm thei ngeiin a rinawm a, chumi atan chuan pum damdawi a chawh lo che a nih chuan Pantoprazole/Rabeprazole lam chi eng emaw ber lo ei thei la (zing thawh pum ruah laiin a ei chi ang), hei bakah hian digestion pui turin enzyme eng emaw ber (vitazyme, rinzyme, aristozyme) lo ei tel bawk la (ni tin vawi hnih chaw ei khamah zel), chung chuan a puih theih che ka beisei.
Antibiotic chungchang hi han sawi belh ta lawk ila. Natna hrik hi chi hrang tam tak a awm a, chung hrik zingah chuan Bacteria kan tih bik thah nan antibiotic hi hman thin a ni a, hrik chi dang Fungus a awm leh a, chung thah nan chuan anti-fungal a awm leh a, a dang lehah chuan Virus hrik thah nan anti-viral a awm leh bawk. Natna hrik tam tak hi anmahni thahna hlo haw thei lo turin an insiam danglam ve thei a (mutation tiin an sawi thin). Chutiang a awm loh nan chuan antibiotic reng reng hi a dose (milligram zat) a pawimawh a, naupang leh cher zual rihna hniamah phei chuan an taksa rih zawng milin chhut thin a ni (mg/kg of body weight). Puitling taksa pangngai chinah chuan a full dose hi chawh a ni tlangpui. Dose tlem emaw, tam emaw hi a tha lo thei a, chutiang avang chuan a dose dik taka inpek hi a pawimawh hle. Dose bakah hian a pek hun chhung hi a pawimawh leh viau. Hrik thenkhat chu tawhkhirh zual an awm a, antibiotic pek chhung ni 5-7 vel ni tlangpui thin kha hetiang hrik thah har deuhah chuan ni 10-15 te thleng pawhin an chawh thin. Entir nan, typhoid hrik nei thah nan hian kar 2 vel lai te ei a ngai thin.
Tunlai khawvela medical science tana challenge lian tak chu Antibiotic Resistance hi a ni. Antibiotic kan hmang common nasa a, doctor rawn lem lo pawhin kan inchawh mawl tawp mai a, a ei chin tur leh ei zat tur dik kan ei leh silova, chu chuan a hrik a kha that kim lovin a chambangte kha chu antibiotic-in an thah theih loh nan chuan an insiam danglam ta thin a ni (mutation). Hemi ti chiang em emtu chu TB damdawihoah hian a ni. TB hrik thah nan hian antibiotic pali kan hmang tlangpui a, chutiang thah theih loh TB hrik Multi Drug Resistant TB (MDR-TB) te a awm phah ta hial a, chutiang enkawl nan chuan antibiotic dang an hmang leh a, chutiang damdawi thah theih loh hrik chu a insiam belh leh a, chu chu Extensively Drug Resistant TB (XDR-TB) an ti a, enkawl a hautak em em tawh mai a ni. Tunhma chuan damdawi class thenkhat – Ciprofloxacin, Ofloxacin te hi zun kawng infection (UTI) ah kan hmang nasa a, that pawh an tha hle. Mahse tun hnaiah erawh chuan resistance an nei nasa tawh a, an thawk hlei thei ta mang lo. Hemi drugs class ami tho Levofloxacin phei chu MDR-TB enkawl nan hman an duh avangin Central authority lam chuan infection dang atana chawh tawh lo turin doctor te min request hial tawh a ni.
Natna hrik te hi an insiam danglam thuai thuai thei a, chuvang chuan antibiotic damdawi chi reng reng te hi fimkhur taka hman a tha hle a ni. Doctor chawh loh chuan ei loh hram hram nise, min chawh ang thlapa ei ni se, a ei hun chhung pawh doctor sawi dan ang thlapin ei ni thei se a tha ber. Hemi kawngah chuan kan Chief Minister thusawi hi ka la hre reng; Champhai Health Mela-ah khan ti hian a sawi alawm: “Hriselna hi ka ngai pawimawh em em a, nawmsam loh a doctor-ten damdawi min chawhte hi ka’n ngai pawimawh nasa khawp a, a ei zat tur leh ei hun chhung hi kim biaiin ka ei thin a, ngaihthat nan mum hnih khat hi ka hmawm belh fo bawk,” a ti. Kan CM ang hian damdawi kan ei chuan ngai pawimawh hram hram thei ila, a bikin antibiotic phei chu i ngai pawimawh lehzual ang u.