Zawhna: Ka pu hi kum 93 mi a ni tawh a, a taksa pum hi engemaw chen atang khan a rawl reng mai thin a, nachhawkna a ei leh mai thin a. Test vel han tih pui turin a chhuak hlei thei tawh bawk si lova, enge a chhan ni thei ang a, engtia enkawl chi nge? Chhanna: Kum upa lam te hi an taksa chak tawh loh chu thuhran nise, an kum rualpui kawmhlim tur an neih mumal tawh loh fo avangin rilru lamah harsatna, a bikin Depression te hi an nei duh khawp mai a. Chu chuan taksa lam harsatna hrang hrang pawh a siam belh chhah thei a ni. Issue hmasa lamah kan rawn tarlan tawh angin kum upa lam enkawl thiam bik, Geriatric Care center te hi kan mamawh ta hle mai. Engpawhnise, i zawhna atang hian chhiartu dang te pawhin an lo tangkai pui beiseiin sawi zau kan tum ange. Kum upa lam te zinga insawiselna common tak tak te chu: 1. Ruhseh (Arthritis) leh Ruh Mawih (Osteoporosis). Kum a lo tam chuan an ruh a calcium hi a lo tlem a, ruh a mawih duh a, an lo chet tlem tawh avangin ruh chuktuah (joints) a lo khawng bawk a, chu chuan ruhseh a rawn siam a. Ruh tliak mai mai te pawh a awm fo bawk. An taksa chet kawngah balance an neih chhiat tawh avangin leh, an tihrawl a lo chak tawh loh avangin taksaa tihrawl hrang hrang a tangrual thei tawh lova chu chuan rawl leh na them thum te a rawn thlen ta thin a ni. Calcium tlakchham hi a awm duh em em a, chuvang chuan calcium supplements te pek regular a tul hle. Hmeichhia phei chu thi hul hnu hian a awm duh zual. Physiotherapy te, body massage te, back care ang te hi pek ngun an ngai hle a ni. Nachhawkna a ei fo chuan a pum lamin a zo lo thuai anga, pumpui bleed te pawh an nei duh hle. Chuvangin nachhawkna pek fimkhur a tha viau bawk. Arthritis ah hian Rheumatoid Arthritis an tih ang chi a neih phei chuan Steroid hmanga enkawl te pawh a tul ngei ang. Blood test tih a ngai anga, Medicine emaw Orthopedic Specialist te lo rawn thei ula. 2. A dang lehah chuan Lung lam that lohna (Heart Disease) hi a common hle. BP sang te, lung lam chak lo hrim hrim te, lungphu dik lo te a awm duh a. BP check regular a mamawh ngei anga. Theih nise chuan Echocardiography leh ECG te ti thei ula duhthusam a ni. Amaherawhchu chet chhuah a harsat thu i sawi a, BP check bakah ECG te hi chu inah tih sak thei te an awm tawh a (Civil Hospital ah a zawh theih ang). Heng tal te hi lo ti thei ula, chumi result chu Medicine lam thiam bik lo entir in anni hian an puih theih che u ka beisei. 3. Chuap lam fel lo (Respiratory Disease). An thawk a tlem tawh a, chu chuan chuap lam fel lo a neih tir duh viau. Asthma emaw COPD kan ti mai a, chung te chu an nei duh viau. Meizu nasa thin phei chuan an nei duh zual. Breathing exercise tih dan te zirtir thei ula, thawk lak kawnga exercise na hmanrua lei tur te pawh a awm tawh a (a to lo), heng te hi hman tangkai a tha hle. Pneumonia te hial pawh hi hriat mang lohin an lo nei fo bawk. 4. Zunthlum (Diabetes). Zunthlum chungchang hi kan ziak fo tawh a. Kum upa lamah chuan regular taka check theih hi a tha hle. Mahni a intest na hmanrua (AccuCheck) te a awm bawk a, a awlsam a, a tangkai hle. Zunthlum an nei anih phei chuan ei leh in lam uluk a ngai hle a, Dietician te pawh rawn theih nise duhthusam a ni. 5. Mental health problem (Rilru lam harsatna). Kan tarlan tak Depression te, Alzheimer's Disease te hi an nei duh a, heng te avang hian harsatna neuh neuh an nei duh zual hle a ni. Psychiatrist te lo be rawn ta ula, Clinical Psychologist tha tak tak te an awm tawh bawk a, hman tangkai theih tak an ni. 6. Zun kawng lam fel lo. Mipa bikah chuan phing hnuaia kan thal (gland) lian ber pawl (Prostate Gland) hi upat hnuah a thang thin a, chu chuan zun harsatna a siam duh hle. Chu bakah chuan kal emaw zun kawnga lung insiam te pawh a awm fo bawk a, heng harsatna te hi a neih leh neih loh hriat tel a tha hle. Kal function tha lo (Renal Parenchymal Disease) te pawh a awm thei bawk. Engpawh nise, test vel chu Laboratory thenkhat hian an technician te inah an tir thei tawh a. Blood Hemogram (Hb hniam leh hniam loh en a tha), Blood Sugar, Electrolytes (Sodium, Potassium, Calcium), Thyroid Function test te leh Urine R/E te tih tir ta ula, engemaw ber chu an hmuh a rinawm. Heng result a zir hian Doctor lo rawn sak ta ula, an puih theih ngei che u ka beisei. Chuan Physiotherapist te pawh inah koh theih an awm bawk a, lo rawn ve ta hrim hrim ula in tangkai pui ka ring bawk. A tawp berah chuan kawmhlimtu an mamawh hle ani tih hi hriat reng a tha hle ani.