Zawhna 1-na: Hmeichhia kum 20 mi ka ni a,ka hnute hnuai chiahah hian thil engemaw rit deuh hlekin min do leh min delh hian ka thaw a chham nghal zel a, blanket rit deuh hlekin min delh pawn ka thaw a chham nghal zel a, hei hi enge a chhan ni ang le? Chhanna: I insawiselna hi pum lam fel lo vanga awm thin reflux disease an tih hi ani thei a. Awm (chest) leh pum (abdomen) daidangtu Diaphragm hi pumpui atanga acid put let hian a chet dan a ti buai thei a, a then chu he diaphragm a pumpui pit chho Diaphragmatic Hernia an tih te pawh an nei thei. Tin, a dang leh ah chuan chuap tuamtu pleura an tih hi a vung thei a, Pleuritis ah hian hetiang insawiselna a awm thei bawk. Nakruh no lai vung Costo-chondritis vangin a awm thei leh bawk ani. Chhan awm miah lo, mahse nangni ang ruala awm duh tak mai chu "Panic Attack" an ti a, rilru lam fel lohna common tak ani. A then chuan mahni chauha rooma awm te an hlau fo bawk. A chhan a zira i insawiselna hi enkawl ngai a ni ang. Zawhna 2-na: Hmeichhia kum 43 a upa ka ni a, zanah hian ka lu hi sat chang a neiin ka lungphu hi a phu nasa em em a, chutia a phut chang chuan thaw tha theilo ang te in ka awm a, che miah lova awm a ngai thin. Zing thawh te hian ka kawng hi chet har ten a awm thin a, engvang nge ni ang? Chhanna: Lu sa te, ke sa te leh lungphu lam fel lo hi thyroid fel loh vangin a awm duh hle a. Thyroid hi kan hrawk zawna gland awm, taksa tana pawimawh tak, a buai erawh chuan harsatna hrang hrang siam thei a ni. Hormones a siam a, chu chuan kan taksa function danah a pui thui hle. Thyroid fel lo hi a sang zawng Hyperthyroidism leh a hniam zawng Hypothyroidism vangin a awm thei ve ve a, a lan chhuah dan a in ang lo thung. Lung lam fel lo, arrythmia hrang hrang vangin i insawiselna ang te hi a awm thei bawk. Thyroid function test, blood sugar leh ECG te lo tih tir ta la, chumi a zir chuan Medicine Specialist i lo pan dawn nia. Zawhna 3-na: Tleirawl kum 18 mi ka nia. Ka khup veilamah hian thil mum marble tiat hi a awm a, chu chu thil engemaw nen a intauh palh hian na em em mai a. Hei hi a dam leh thei em? A dam theih nan engtinnge ka enkawl ang? Chhanna: Taksa pawnlang a bawk awm chi reng reng hi a tam zawk chu a hlauhawm loh a. Kan venthawn tur chu a than leh than loh te, a tuamtu vun rawng a inthlak danglam leh danglam loh te, na a siam leh siam loh te a ni. Tam zawk hi chu thau hlawm, Lipoma tia kan sawi fo hi ani. Thenkhat chu thazam atanga insiam neuroma te pawh ani thei a, arngeng inhlawm lian chi te pawh ani thei bawk. Eng ber anih hriat nan Fine Needle Aspiration Cytology (FNAC) tih phawt a ngai a, chumi a zir chuan an enkawl thin a ni. Bawk insiam tawh hi chu a tlangpuiin a reh leh mai mawh a, ti reh emaw dam tur chuan zai a ngai thin.