Zawhna: Ka pu, kum 19 mi ka ni a. Thla hnih vel liamta atang khan ka mawngkaw bulah hian pangtichawr ang deuh, nem lampang a awm a. Thil hlauhawm ani ang em, engtia han tih tur nge niang? Chhanna: Pangtichawr i tih chuan singsihlit kan tih ang chi te pawh hi anih hmel a, Anal/Peri-anal Warts (Condyloma) an ti. Hetiang hi a tam zawk chu virus chi khat, Human Papilloma Virus (HPV) avanga awm ani thin a, chung zinga a tam zawk chu sex hman atanga kai ani fo bawk. Thil hlauhawm chu ani em em hran lo nangin inkai darh a awl a, tin, a darh duh bawk. A hrik thahna damdawi tak hi a awm hranpa lova, a awmna hmun atanga tihrem emaw tih bo hi a enkawlna chu ani ber. Chumi atan chuan Podophyllin hnawih chi an chawh thin a; mahse, he damdawi hian vun him lai a ei thei a, chuvangin hnawih fimkhur a ngai viau. A dang leh ah chuan zai (surgery) hmang emaw, electric hmanga tihral (cautery) te pawhin an enkawl bawk thin. Zawhna: Kum 32 mi ka ni a, fa pahnih ka nei tawh a. Ka fa pakhatna ka pai lai hian thla 5 vel anih atangin ka kut hi a mu vek a, a khawng bawk a. A hrehawm em em a, ka mut hian a zual bawk sia, zan pawh ka mut tlem phah fo. Mahse nau ka han nei a, a reh ta vek a. A pahnihna ka pai leh a, a ngai ang chiahin a awm leh a. Doctor te poh ka rawn a, mahse engmah ka ngeih lo. Fa pahnihna ka han nei leh a, ka kut chu a reh ta miah lo a. Tin ka rai hian ka vung nasa thei em em mai a, ka tan chuan nau han pai leh pawh a chak awm tawh lo. Engtia tih chi nge ni ang? Chhanna: Kut mu i sawi hi thazam (nerve) lam fel lo Neuropathy chi khat anih hmel a. Hetiang hi i naupai hmaa awm tan emaw, i naupai vanga lo awm ani thei a. Chu bakah chuan Diabetes (zunthlum), Vitamin tlakchham, Liver hnathawh buai vang te leh, naupai huat vanga luak vak vak vang te pawhin a awm ve thei bawk ani. Rai laia BP sang Preeclampsia vangin a awm thei bawk a, chu chuan i rawn sawi taksa vung te hi a thlen tel fo a ni. Zunkawng lam fel lohna thenkhat vangin a awm thei bawk. Doctor i lo inentir tawh anih chuan heng te hi an ti em? - BP leh Blood Sugar regular taka check, Zun test, a bikin Protein i zun chhuah nasat dan en te, Hb hniam i nei em tih te, thisen zam puar (varicose veins) i nei tel em tih te. Vung hrim hrim hi chu naupai lai chuan a awm tura ngaih a ni a, vung duh bik te hi an awm ve leh bawk a. Engpawhnise, test tih ngai te hi lo ti ta la. Chumi bakah chuan i nghawng lamah fel lo a awm leh awm loh hriat nan MRI Spine te lo tih tir thei bawk la. Heng test te hi a normal vek anih chuan a hlauhawm lo turah ngai phawt ila. Test result fel lo a awm erawh chuan Gyne Doctor bakah Medicine Specialist i lo inentir leh dawn nia.