Zawhna: Ka pu, hmeichhia kum 25 mi ka ni a, ka lu hi a hai reng thin a, ka inentir pawhin luhai satliah min tihsak zel mai a, ka BP pawh a normal tho si a. Enge a chhan ni ta ang? Min puih theih chuan ka lawm ngawt ang.

Chhanna: Luhai hi a chhan hrang hrang a awm thei a, kan thluak ah hian kan taksa balance innghahna a awm a, chu chu kan thil hmuh leh hriat te (vision and hearing) nen a inkaihhnawih a. Chutiang avang chuan mit leh beng lam fel lo vangin luhai hi a awm fo thin a ni. I rawn sawi ang hian BP hniam emaw sang hian luhai a thlen hmasa fo thin a, a dang leh ah chuan taksa chak lo, ei leh in mumal loh vanga nutrition dawng tha lovin a thlen Hb hniam (Anemia) te hi luhai thlentu common tak a ni bawk.

I zawhna behchhan hian ka han sawi zau lawk ange. Kan beng chhung inner ear ah hian organs tereuhte pahnih pawimawh tak mai a awm a, chu chu Cochlea leh Vestibular System (Semicircular canals) an ti a. Semicircular canals ah hian tuiril a awm a, chu chu kan taksa a chet khan a che tel a, hei hian sam sin te te awm kha a va khawih harh a, chuta tanga signal kal chuan kan thluak ah information thawn in kan taksa position kha siam rem turin tihrawl te a lo ti che leh thin a ni. Chumi balance chu a buai chuan ho te te a chet khan luhai a lo thlen ta fo thin a, chutiang avang chuan luhai a awm fo hian BP a that bawk si chuan beng check tir kan chawh fo thin. 

Tin, mit hmuh a fiah loh hian kan taksa a in adjust har ta thin a, chu chuan luhai a thlen fo bawk. Tarmit power dik lo vuah hian luhai a thlen duh khawp mai a, i mit power endik (Refraction test) a tul ngei bawk ang. Mit hman rim hrim hrim hian luhai a thlen hma khawp mai. Tunlaiah chuan computer mai bakah mobile phone kan khawih nasa hle tawh a. Phone screen size hi en rim chuan mit in a zo lo duh hle. Movie en nan leh Games khelh nan kan hmang nasa bawk nen, mit a rim duh hle. Mit rest tam nachang hriat a pawimawh hle a, tin, eye strain neih phah pawh an tam a, light awm tha lo emaw thim lutuk a phone khawih phei chu mit in a haw duh hle. 

Ei leh in lam that tawk loh vang emaw nutrition a that tawk loh vanga Hb hniam (Anemia) a awm chuan kan thluak hian oxygen a mamawh zat a dawng thei lo thin a, chu chuan kan thluak a thisen zam a rawn ti vung a, lu na leh luhai a rawn thlen thei bawk a ni. Chutiang avang chuan i Hb pawh check a ngai ngei ang. Vitamin B12 tlakchham hian nerve lam harsatna a thlen thin avangin luhai te pawh a awm fo bawk. Tin, blood sugar hniam ah hian luhai a awm duh phian bawk. Lung lam fel lohna, a phut dan dik tawk lo Arrhythmia a awm chuan luhai hi a thlen thei a, marphu check te pawhin hriat theih dan a awm thei a, Medicine Specialist lam i inentir a tul tel hmel. Infiam nasat emaw hah lutuk vanga taksa in tui a tlakchham (Dehydration) hian luhai an nei fo mai.

Kum naupang lamah hian Hyperventilation Syndrome an tih mai, thaw vak vak (an hriat kher loh pawhin) an nei ve thin a, chu chuan luhai a thlen thei a. Tin, Orthostatic Hypotension an tih mai, din ngil chiah a BP rawn hniam thut a awm thin a, kum upa lamah a common a, chutiang chuan luhai chum chum a rawn thlen thin bawk a ni. Engpawhnise, check tir ngai ka rawn sawi bakah khan Medicine lam chu lo inentir nawn leh thei la, i insawisel chhan hi an hriat chhuah a, an enkawl dam theih ngei che kan beisei.