Zawhna: Thawhah nei ka ni a, tunhnai hian ka khua a sik reng mai a. Ka thawhah hi a zual bawk a inhaler hian min chhawk loh chang a tam ta mai. Ka pum lam hi a fel lo bawk a, doctor hi ka pan ngun tawh viau a hma ka sawn mawh hle. Thawhah (asthma) hi engtia awm nge min hrilh thei em? Inhaler hi engtia thawk nge? Ka hman lai hi Budamate 400 a ni a, zing leh tlaiah hmang turin min ti a, a hah changin asthalin hip turin min ti bawk a, hemi te 2 hian min chhawk tawh lo. Engtin nge ka tih dawn? - Lawma Chhanna: Thawhah han tih hian “Asthma” a ni thei a, thil dang pawh ani thei a, a khaikhawm nan COPD (Chronic Obstructive Pulmonary Disease) tiin an sawi thin a. Asthma pawh hi a chhan a zirin chi hrang hrang a awm thei a, a then chu naupan lai atanga intan te, a then chu puitlin hnua nei te, meizuk nasat vanga awm te leh, thil huat (allergy) vanga awm te ani thei bawk. Chuap infection vanga nei chawp te pawh an awm fo bawk a ni. COPD tiin sawi chhunzawm tawh mai ila. Hetiang harsatna eng emaw ber nei te chu an chuap a boruak luhna dawt a lo zim a, a vung bawk a, boruak an hip luhin a chhuak leh tha thei lova, chu chuan boruak thianghlim lo a up khawm a, oxygen kham loh avangin harsatna an nei ta thin a ni. A rei chuan lung lam thlengin a ti chak lo thei bawk. Asthma bikah hi chuan boruak inthlak te, meikhu vang tein chuapa boruak luhna dawt te hi a lo zim zual thin a, chu chuan thawhah zual (acute episode) a rawn siam ta thin a ni. Inhaler hi a enkawlna chi khat a ni a, a damdawi hrang hrang a awm a, chuap a thawk Bronchodilator an tih mai damdawi te, chung zingah chuan Asthalin Inhaler hi kan hriat lar chu a ni awm e. I hman lai Budamate hi Corticosteroid drugs a ni a, hei hi chuan chuap boruak luhna vung a control thung. An dinhmun a zirin a then chu inhaler chi hnih thum lai hmanga enkawl te pawh an awm bawk. Inhaler ni lo, a ei chi Deriphylline te pawh an chawh bawk thin. Engpawhnise, Lung Function Test (Spirometry) te hi thawhah nei tan chuan tih fo theih nise a tha hle. Hei hian eng ang chiahin nge chuap a chak dan a lo en a, target te insiamin hmalak dan tur te an duang thin a ni. Thawhah nei tana enkawlna an pekin tinzawn (target) an siam thin te chu: 1. I harsatna tih nep, 2. I chuap hnathawh chak lo tih muan (slow decline in lung function), 3. Nitina chuap function tih chak dan tur ngaihtuah, 4. Thawhah thut (acute episodes) nei tlem tura hmalak te a ni. A enkawlna kawngah hian thawk dan “Breathing Exercise” te, thawk pui tura boruak hip exercise (hmanrua lian lo tak) neih te hi a tangkai zual hle. Tin, meizu mi bulah awm loh hram a pawimawh a, meikhu hrim hrim laka inven te, infection nei lo tura in uluk, neih palh pawha treatment lak thuai thuai te hi a pawimawh zual chu a ni. Medicine Doctor lo rawn nawn leh thei la, i damdawi hman lai te pawh thlak a tul a ni thei bawk ang.