Zawhna: Mipa kum 55 ka ni a, dawr nghak thin ka ni. Ruihtheih thil zu leh zuk leh hmuam ka ti ngai lo va, ka thau lo a, cher tak ka ni bawk lo. Thla khat vel kalta atang khan ke leh taksa sa huam huam ka nei tlat mai a, ka kawrte hi istiri-a nawh hlim ang mai hian ka feel thin a, engvang nge ni ang? A hlauhawm ang em? Chhanna: Taksa, a bikin ke leh kut sate hi a chhan tam berah chuan nerve lam fel lo vang a ni thin a. Kan taksaa sensation hriatna – lum, vawt, dai leh na hriatna te hi lo dawngsawng a, reaction lo insiamna hi kan nerve (thazam) kutah a innghat a. Nerve hian heng hriatna sensation te hi thluakah a thawn khawm a, thluakin a lo thliar hrang ta thin a ni. Nerve hnathawh dan tibuaitu zinga a chhan common ber pawl chu zunthlum (Diabetes) hi a ni awm e. Zunthlum hian nerve-a hriatna thazam kal vel kha a timuang a, chutiang avang chuan taksain hriatna kha a hloh ta tial tial thin a ni. A chhan dang lehah chuan Vitamin tlakchham vang a ni duh viau – Vitamin-ah pawh B1, B6, B12, Niacin leh E tlakchham hian a awm duh bik. Zu in nasaah hian B12 tlakchham hi a common khawp mai a, nerve chak lo Neuropathy hi an nei duh hle. Zu emaw, chhan dang vangin thin (Liver) hnathawh hi a buai fo mai a, chu chuan Vitamin insiam hi a tibuai thei a, chutiang atang chuan nerve fel lo hi a awm thei a ni. Chhan dang common leh chu Thyroid function buai hi a ni. Ruihtheih thil lam engmah i ti lo va; amaherawhchu, dawr nghak thin i nih avang hian i chaw ei hunbi te a buai fo a rinawm. Liver Function Test, Thyroid Function Test leh Blood sugar te lo test hmasa thei la, a chhan a hriat theih a rinawm. A dang lehah chuan mental disorder eng emaw vangin a awm thei bawk a, chung zingah chuan Panic Attack an tih maite hi a chhan common ang reng tak chu a ni bawk. Engpawhnise, Medicine Specialist te lo inentir la, an enkawl dam theih ngei che ka beisei. &&&&   Zawhna: Ka pu, kum 25 ka ni a, pasal ka la nei lo va, kum khat leh a chanve vel ka period tawh lo a, hei vang hi nge ni ka vun a êng thei miah lo mai a, bakah ka rilru a dawih ta lutukte hi ka period loh vang a ni thei ang em? Ka mang a ang tak zet, min puih theih chuan ka lawm ngawt ang. Chhanna: Issue hmasa lamah thi neih buai hi kan tarlang tawh thin a. Hmeichhe thi neih hi hormones chi hrang hrangin taksa a hna an thawh atanga lo awm thin a ni a. Chung zingah chuan chibawm (Ovaries) atanga insiam Estrogen leh Progesterone te, thluak lama insiam Follicle Stimulating Hormone (FSH) leh Luteinizing Hormone (LH) te hi a pawimawh zual chu an ni a. Hei bakah hian Thyroid hormones te hi an pawimawh tel bawk. Thi i neih loh rei tawh avangin nau i pai lo chu a nih hmel a, chuti chung chung chuan nau pai leh pai loh confirm hmasa thei la chu a tha viau mai. Sex i la hmang lo a nih erawh chuan a tul lovah ngai ta ila. A dawt lehah chuan chibawm lam fel lo, chibawm atanga hmeichhe chi insiam dik lo emaw, siam fel tawk lo Ovulation problem emaw vang a ni duh hle. Chibawm mai bakah hian chhul lam fel lo eng emaw ber i nei pawh a ni thei a, chungte chu hre chiang turin ultrasound lo ti hmasa ta la a tha hle mai. A dawt lehah chuan Thyroid lam fel lo i nei nge nei lo hriat nan Thyroid Function Test lo ti leh thei bawk la. Taksa rit lutuk emaw cher lutuk te, chaw ei mumal lo leh ei tlem lutuk ah te hian thi neih buai a awm duh hle bawk. Tin, thi neih leh thluak lam function hi a inzawm thuk viau mai a, thi hul hnua rilru lam buai te hi an awm fo bawk a ni. Dawih lutuk nia i insawi te pawh hi i thi neih buai nghawng a nih hmel viau. Vun tisa nung lo, dul leh chul deuhte pawh i thi neih buai nghawng tho a nih hmel. Engpawhnise, hmeichhe doctor lo in-check chiantir deuh la chu a tha ber ang.