Zawhna: Ka pu, puitling zun chhuak insum thei miah lo hi eng vang nge? Zunkawng that loh vang a ni thei em? 

Chhanna: Zun chhuak insum thei lo (bladder control problems) hi a chhan hrang hrang a awm thei a. Kan hriat hmasak atana pawimawh chu kan phing (bladder) ah zun a lo inkhawl hian, 240 ml vel a lo nihin zun chhuak kan feel tan a. Puitling hrisel pangngai chuan litre chanve (1/2 lts) aia tam pawh hi lo tling mahse an la insum thei thin. Chu insumtheihna chu kan phing hualtu tihrawl leh nerve in a control a, chhan engemaw avangin tihrawl leh emaw nerve lam fel lo a lo awmin a lo buai thei thin a ni.

Bladder control problems kan tih hi a chhan hrang hrang a awm thei a. Kum a lo tam hian kan tihrawl a lo chak lova, hmeichhe chu an chhul leh serhkua te a lo rule a, a lo sawng bawk a, mipa ah chuan phing hnuaia thal chi khat Prostate gland te a lo thang thei bawk a, chu chuan he harsatna hi a thlen thei. A dang leh ah chuan bladder emaw zunkawng (urinary tract) infection a awm hian hetiang harsatna hi a awm duh bawk. Ek khal, e tha thei lo harsatna nei te hian an nei tel duh phian bawk. 

A dang leh ah chuan khuh (cough) nasat vangin a awm thei a, khuh benvawn nei, chuap lam fel loh vang te pawhin a awm thei a, thau lutuk (overweight) te, zunthlum nei ah te hian a awm duh viau bawk. Hmeichhia fa nei tawh te ah hian an serh leh mawngkaw bul bawr tuamtu tihrawl (pelvic floor muscles) chak lo a awm thei a, chu chuan zun insumtheihlohna hi a siam fo bawk. Urinary incontinence an tih mai, phing a zun rawn tling hlek a, khawl thei lova zun chhuak nghal zel mai hi an awm ve thin.

Heng chhan hrang hrang te hi rule out a ngai a. Zun test (urine routine examination), ultrasound, blood sugar etc test a tha ang. Nerve lam fel lo vangin a awm thei tih kan sawi a, zu in nasa te hi an nerve lam buai a awm fo a, hetiang harsatna hi an nei duh viau mai.

Zawhna: Ka pu, kan fapa kum hnih a upa hi a chaw ei a tui lo in a rualpui zingah a cher bik em em mai a, vitamin tha chi tinreng chu kan pe ve thin takna a. Engtia enkawl chi nge ni ang? A hriselna erawh a tha tho thung a.

Chhanna: Naupang hi hrisel tho si a thau duh chi te, cher reng mai te an awm thei a. Chaw ei chak tlat lo te pawh an awm fo mai. An taksa mamawh zat ei leh in an lakluh a pawimawh khawp mai a, insawiselna nei lem lo mahse chaw ei tui lo emaw chak lo an nih chuan a chhan engemaw tak a awm thei ang. Stress kan tih hi naupang pawhin an nei thei a, depression te thleng hian an nei thei a, an lan chhuah tir thiam lo zawk fo.

Naupang hriselna tehna atan chuan an taksa chet tam dan physical activity te, zan an mut that leh that loh te, an ek mumal leh mumal loh te, midang bula an awm dan te, thian an kawm dan te hi chik a pawimawh thei ang. An cher reng mai anih a, an rih zawngah hma an sawn lo anih phei chuan malnutrition an nei thei a. Hrisel angin lang mahse hrileng lakah an sihhnip duh phian.

Engpawhnise, naupang enkawl kawngah chuan naupang doctor (Pediatrician) te thurawn lak a pawimawh hmasa viau mai a. Mahni a vitamin lo pek ngawt ai chuan a cher reng chhan te a awm leh awm loh hre turin kan naupang doctor te lo entir thei ula, harsatna an nei anih chuan an hre chhuak thei anga, an pui thei ngei bawk ang che u.