Puitu che khan an chhuah zalen dawn ta che, i kutah engkim a awm ve dawn ta si a..Puitu che khan an chhuah zalen dawn ta che, i kutah engkim a awm ve dawn ta si a.. DRUGS NGHEI ZUI ZEL DAN TUR (Part I) Drugs i nghei tan ta a. Damdawi in atangin emaw, centre atangin emaw i chhuak ta a. Mahse, indona a intan dawn tan chiah tih hria ang che. A awm lohna hmuna nghei hi nghei a la ni lo a, a awmna hmun, thlemna awmna leh hmuh mai tur a awmna hmunah nghei zui a tul ta si. Nangmah vengtu leh puitu ten an chhuah zalen hun che a thleng ve dawn ta a. I kutah engkim a awm ve dawn ta. Chutih huna i tihdan tur tha leh i hriattur pawimawh tlem azawng titi zui ang aw... Drugs châkna lo awm leh thin hi a ni buaithlak chu tiraw? Châkna tihreh thakna damdawi hi a vâng khawp (Châkna titlem thei te, ruih theih lohna damdawi te chu nakinah kan la sawi ang). Châkna hneh hi a harsa lai a ni fo. Châkna lo thawk leh vut vut hi a rei ngai lo tih hria la. I bawhzui loh chuan a reh leh dawn tih hria ang che. Châkna chhuah ve leh phi nghal ruai duh suh. Test paltlang tur hautak a ni tih hria la, i theihna i lantirna tur hun a ni tih hriaiin intipaukhauh rawh. Châkna lo awm det det bawhzui nghal vut vut mai hian sualah min hruai lut fo. Châk zawng hi tihpuitlin nghal tum vaih chuan a zual ting mai. I zawn ruk deuh phei chuan a zual zel ang a, i zawn hmuh loh phei chuan a zual ting mai a nia! I zawng hla peih telh telh mai ang. Chuvang chuan châkna a lo chhuah khan, “Ka zawng dawn lo, kan nghak lawk ang e,” tiin i rilru la peng daih tur thil dang ngaihtuahin hna thawh tur zawng thuai la. Mi rintlak kawm tur zawng bawk rawh. Hmaichhana kawm tur, len maina tur i hriat loh pawn phone-a biak tur ‘mi tha’ zawng ang che. Bible la la, chhiar la, tawngtai rawh. A sawt khawp mai. I châk veleha drugs ti thin leh zuar thin phone number hlui i hai duk duk zawngin i hneh lo thuai ang. Drugs nghei dawn tirh hian drugs kaihhnawih phone number-ho kha paih bo vek sa tur a ni tih kan la sawi chiah lo tak e! Delete vek rawh! Chatuana nghei hlen tih lam hi ngaihtuah thui chiam duh tur a ni lo. Ni khat lek lek nghei turin i rilru siam la, ni thar a lo chhuah khan, “Vawiin chu ti lo leh ang,” tiin ni khat atan ruahman bek bek rawh. Zu ngawlvei, nghei duh ka enkawl thenkhat hi ‘zu in ngam lohna thla li chhung ei tur’ ka chawh dawn hian rei an ti tlat zel!! “Thla khat ti phawt ila, thla hnih ti phawt ila,” an ti fo. A dik reng. Ni tin nghei mai hi a tawk khawp. Ni khat atan zel i nun hmang tha bek bek mai rawh. Vawiin i nghei ang a, a tukah ‘vawiin’ i nghei leh mai ang a, chutiang zelin ‘vawiin’ nghei  zel khan kum a vei thuai mai asin! Thian thlak a tul fo. Drugs tih laia thiante kha tun atana kawmah an tha ber tawh lo fo. An sual vang ni loin, keimahni lam hi mi chak lo kan nih avangin kan chak lohna min tichak lo zual thei an ni palh takin pumpelh a him fo. Thian sual kawm suh intihna lam a ni lo. An sual bik hran lo, nasngmah kha i chak loh avangin kalsan rawh tihna a ni e. Ruihpui thinte nena inhmuh chuan subject dang sawi tur a vâng thin. Drugs titi chuan tihchâkna a kaichhuak leh thin. Drugs ti ngai lo, nun kawng tha zawka min kaichhuak thei thian thar neih a fuh thin. Thiante chang a ni lo, drugs tih thinna hmun leh veng te, kan lei thinna hmunte kal loh a tha. A zuar thin pawh kawngsir lehlamah hel luih tawk tawk tur! Drugs tihna hmanruate pawh paih bo vek tur. Hmun leh hun leh mihringte hian ‘memory’ a kai chhuak fo. Insum a har, chak leh a awl, tih leh a sam bik!