Zawhna 1: Zawhna 1: Kum 33 mi ka ni a, thla hmasa atang khan ka kawng hi a na kham em em a, ka din leh ka thu tha thei lova, ka thut lahin ka ding char leh mai thei lo nen, hmun phiaha kun te hi ka ti hlei thei mang lova, doctor ka la rawn lova, engtia enkawl chi nge? Zawhna 2: Kum 35 mi ka ni a, pasal 2003 khan ka nei tawh a, fa kan la nei lo a, ka inentir thin a, thi te a put thin a, sex hmante hian a nat bakah thi tlem a awm thin. Pap smear pawh ka ti tawh a, a tha an ti a, i chhul a tha an ti bawk si; ka thi neih mumal thei bawk si lo, ka taina awm deuh reng thin bawk sia, engtia enkawl chi nge? Chhanna: Heng zawhna pahnih te hi a inkaihhnawih deuh a a lan vangin chhan kawp mai kan tum ange. Zawhna hmasa zawk hi hmun phiah te a sawilan vangin hmeichhia ni turah ka han ngai ngawt mai a (pa berin kan phiat ngai lo tihna chu ani hauh lo nangin), ka ring sual em lawng chu maw. A insawi dan atang hian hmeichhe lam fel lohna a nih theih vang te in kan la kawp ta mai a ni. Hmeichhe lam fel lo han tih hian chhul, chi kawng, chi bawm, chhul bul tisa (adnexal tissue), zun kawng leh rilpui, a bikin ek chhuahna tur lai (rectum) lam thleng hian a kaihhnawih thei a. Chutih rual chuan kawngruh fel lo te, thazam lam dik lo (sciatic nerve mawngtam zawha rawn zam thla) te pawh sawi tel a tul bawk ang. Hmeichhia hi thla tin thi neih hi a pawimawh em em rualin thenkhat tan chuan phurrit ani duh viau mai a, a chhan pawh thi nei tura taksa inruahman hi a eng emaw ber lai a fel loh hlek chuan a chunga kan sawi harsatna hrang hrang hi a lo lang nghal mai zel. A enga pawh chu nise, pawimawh hmasa ta chu hmeichhe lam fel lohna a awm nge awm lo hre turin Ultrasonography tih a ngai phawt anga. Zawhna hmasa zawttu hian i kawng X-Ray a ngai ngei bawk ang. Ruh doctor (Orthopedic Surgeon) inentir ta phawt la, X-Ray report-ah kawngruh lam fel lo a awm chuan a enkawl tu tur che chu a ni ngei ang. Hmeichhe lam fel lohna a nih thung erawh chuan Gynecologist i pan a ngaih hmel. Na chhawkna ei ngawt mai hi a fel lova, reilote a chhawk chauh anga, a rawn na leh thin ang. Chutih lai chuan i pum lam a khawih pawi hlauh thei bawk. Zawhna 2-na zawttu hi chhul tha an tih hian ultrasound in an en che em tih i sawi hran lova, clinical examination ngawt lo deuh a ultrasound hmanga i chhul leh zun kawng te check a tha hle mai. Zun test te pawh ti thei la, zun kawng infection (UTI) i lo nei anih chuan i insawiselna ang hi a thlen ve thei a ni. Fa neih theih loh chungchang bakah sex hman changa na i rawn sawi avang hian i chhul lam fel lo chu a rinhlelhawm ang reng khawp mai a, thi i neih mumal loh bawk avang hian hormone test te tih bakah, chhul chhung leh chi kawng pin leh pin loh en nan Hysterosalpingography (HSG) te pawh tih a tul a rinawm. Hemi bakah hian Thyroid lam fel lo hian thi neih mumal lo te, fa neih harsatna te a thlen ve fo mai bawk a, chuvangin Thyroid Function Test te pawh ti thei la a tha hle mai. Ultrasound i tih chuan i chhul, chi kawng leh chi bawm bakah, zun kawng lam te an en chiang thei ngei anga. Infection a awm chuan antibiotic treatment i mamawh bawk ang. Thi neih hi hmeichhia ti hmeichhia tu ani a, nau an pai thei tih ti chiangtu ani bawk. Chutiang khawpa a pawimawh lai chuan harsatna thlentu common tak ani a, a then phei chuan rilru lama harsatna thlengin an neih phah thei a ni. Chuvangin thi neih lama harsatna emaw mumal lo ang chi te i neih chuan ngaihthah lovin hmeichhe doctor rawn ngei thei la, a hnu lama harsatna awm thei tam tak lakah i him phah thei a ni. Pap Smear hi chhul leh a bul hnai tisa a timur (cells) awm dan enna a ni a, cancer intan tir hriat theihna pawimawh tak mai ani a. Kum 40 pel tawh i nih phei chuan kum khatah vawi hnih khat tal chu ti ngei thei la tiin ka han khar ani e.