Zawhna: Kum 54 mi ka ni a, zunthlum kum 5 vei tawh ka ni. Tun hnai atang khan sex lamah ka chaklo a. Doctor in sos atan damdawi min pe a, sos hi engti kar dan tur nge, kartin emaw a aia zing pawhin emni? Hei hi hman reng a tul tawh dawn em? Hman a ngai ta fo mai si a, min hrilhchian ka va mamawh em! Ka buai ru tlat. Tin zunthlum hian memory a hlauh thei em? Chhanna: Zunthlum (Diabetes) natna hian kan taksa ah hian tih buai theih loh vak a nei lova, kal, mit, lung leh thazam (nerve) lam te hi a khawih buai duh zual chu a ni. A vei rei lam ai mah hian control that leh that loh hian a hril thui hle a, rei tak zunthlum nei, mahse damdawi pawh mamawh em em lova ei leh in leh taksa sawizawi a inenkawl thei an awm fo a ni. I vei hun chhung (i inhriat chhuah atangin ti ta ila) hi kum 5 a ni a, eng ang enkawlna nge i lo dawn tawh i sawi hran lova. Damdawi ei chi (oral hypoglycemic drugs) nge i lak a Insulin Injection tih i sawi lova, a engemaw zawk chu i la ngei ni chuan a rinawm a. Eng ang chiahin nge i in monitor tih hriat a tha viau bawk. Mahni inah ngei in test theihna Accucheck te hi a awm tawh a, heng hmang hian kar 1-2 danah zing kar riltam lai (fasting) leh chaw ei atanga darkar hnih hnu (post prandial) a i blood sugar hi check fo thei la a tha hle a ni. Chu chuan i treatment lak lai te a thawk tha nge tha lo a ti chiang thei bawk ang. Kan sawi tak angin zunthlum hian hriatna thazam (nervous system) a ti buai duh khawp mai a. Chu chuan nerve chak lo kan tih, nerve function tha thei lo te a siam a, thisen zam a ti zim tel bawk a, chuvang chuan sex lama chak lohna hi a thlen duh hle. Hetiang a lo awm hian damdawi hmanga enkawl ai mahin blood sugar sang tur control lam zawng hian inenkawl a pawimawh zawk mah a, a chhan chu sugar a lo san zel chuan damdawi khan a tirah chhawk mahse a rei ah harsatna a awm belhchhah duh zawk mah a ni. I sugar hi i control that leh that loh i in monitor uluk hle a ngai tihna a ni. Sex lam chak lohna atan hian damdawi hrang hrang an hmang a, SOS i rawn sawi tak hi chu Herbal lam damdawi anih a rinawm a (ka lo hriat loh tak mai ani pek a). Herbal damdawi hi kan hriat loh lam deuh ani a, thenkhat chu tha tak tak a awm a, thenkhat erawh hman fimkhur a tha hle. Khawchhak lam damdawi phei chu a content hriat chian theih mang loh te a ni a, ei loh tluk a awm lo a ni. Memory (hriatna) lam pawh hi zunthlum hian a ti buai thei teh meuh mai a. Central Nervous System hrim hrim hi a khawih buai thei a ni. Blood sugar control mumal lo ah phei chuan mood swing an tih mai, a changa thinrim thut, a changa hlim leh em em te a thlen fo a, Depression te pawh an nei duh hle. Kan sawi tak angin zunthlum nei te chu blood sugar control that hi a pawimawh hmasa ber a ni a. A theih chuan kum khatah vawi 2 tal in check up nise, kidney function te pawh in monitor uluk a pawimawh hle a ni. Damdawia enkawlna chungchangah chuan Diabetologist/Medicine Specialist te rawn hmasak zel nise.