Zawhna: Ka pu, kum 72 mi hi zunthlum nei a ni a, a chet sual vangin a kawng a ti na a, eng emaw chen chu a khum bet titih tawh a, zunram thiar vel pawh a harsat avangin a khum bulah kan inthiartir mai thin. Tun hnai khan a châwn tha hi na a ti tlat mai a, khawih zawngte hian a tek nâ angte hi a feel zauh zauh bawk. A ke chet chu a tibuai hran lo thung. Engtia han enkawl chi nge ni ang? Engnge a chhan ni thei ang? Covid vangin pawn chhuah a damdawi in han panpui kan hreh bawk sia, min puih theih chuan ka lawm ngawt ang.

Chhanna: Kum upa lam, tar chak tawh lote hi intih palh lakah venhim an ngai khawp mai a. A tlangpuiin khum bet nasa te an nih loh phei chuan an khawhar chhawk nan hian han len khawthawnte hi an châk zual emaw tih tur a ni a. Khawlaia anmahnia han mal lentir ngawk ngawk pawh hi an ngaihtuahawm duh viau mai. In lamah lah mi kan lo buai tawh vangin han awmchilh chawt a vengtu tur an nei lo fo a, mahni inchhung a step kal fo ngai te, inthiarna remchang lo te, in bul hnaia step kal ngai chi angah te phei chuan fimkhur zual a ngai hle. 

Kum upa lamte hi an reflex a chak tawk tawh loh avangin an tluk palh pawha an taksa inveng thei tur khawpin an fit tawh lo va, an tluk sual hian kawng, khel ruh leh dar leh nak bawr te hi an tina palh duh khawp mai. Ruh tliak an neih lahin a tisawngnawi zual duh leh nghal a, a chenpuituten kan fimkhurpui an ngai khawp mai. Covid leng avang hian mi tam zawk inah kan tawm nasa a, kan taksa a che tlem a, kan rih belh nualin a rinawm bawk. Upa lam phei chu i rawn sawi ang hian pawn chhuahpui an huphurhawm hle awm e. Awm hmuna taksa eng emaw ti zawng tala insawizawi dan kan ngaihtuahpui a tha hle. Anmahni an chet that peih loh pawhin physiotherapy te tihsak thei ila, a nih loh pawhin massage te hi a tangkai duh viau bawk.

Zunthlum a neih leh neih loh hriat a tha hle mai. A lung lamah fel lohna a neih leh neih loh i sawi hran lo va, check theih nise a tha hle viau bawk. A bikin ECG te tal lo tihsak thei ta ula. Khum bet titih an nih phei chuan annual check-up mai ni lovin kum khatah vawi 2-3 te pawh blood test te ti thei ula a tha khawp ang. Chuan, khum bet deuh reuh a nih chuan a taksa a che tlem viauin a rinawm a. Fimkhur ngai ta chu a vein lam fel lo, Deep Vein Thrombosis (DVT) an neih loh nana hma lak pui hi a ni. DVT hi vein chhung bang chhah emaw tihpalh emaw thisen luang muang vanga thi khar insiamin vein a hnawh vanga awm thin a ni a. Zaipui tawk te, Cancer treatment la laiah te, meizu nasaah te, taksa rit lutuk te, bed rest rei lutukah te pawh a awm thei thin. Thlawhna a zin nasaah te a awm duh viau bawk. Nu naupai laiah te, nau neih hnu atanga kar 4-6 ah te, naupai venna oral pills ei lai ah te a awm duh bawk.

DVT hi lang chhuak mai lovin a awm thei a, a hlauhawm nachhan ber pakhat chu thisen zama thisen khar (thrombus) bet a kha a bung emaw darh palh chuan vein ah kal chho in lung emaw chuap ah emaw a lut palh a, chu chuan thihna hial a thlen thei a ni. A ke nat dan i han sawi khan a rinhlelh awm thei viau mai a, a thenah chuan ke a ti vung thei bawk. Pawimawh ta chu DVT a lo ni palh anih chuan enkawl thuai a ngai a, confirm turin Ultrasound tih a ngai ani. A rem theih dan hram a awm chuan Ultrasound hi lo ti ngei thei ula, DVT a lo nih loh hlauh chuan a ngaihthat thlak phawt anga, a chhan dang zawn leh a ngai dawn ani. 

DVT a lo ni lo palh hlauh anih chuan tha chat (muscle cramps) vang te pawhin a awm thei bawk a. Ke chet tlem ah te, upa lamah phei chuan calcium tlakchham mai mai te a awm duh vangin hei hi hriat tel a tha hle. Physiotherapy an mamawh thin a, DVT laka inven nan hian chutiang enkawlna chu pek tel theih a tha hle. Khumbet rei chi ah reng reng chuan physiotherapy hi tih thin a tha hle a, tihrawl an massage tel a, chu chuan thisen che vel a pui a, harsatna awm thei hrang hrang lakah a veng bawk thin. Engpawhnise, surgeon lo entir thei ula chu duhthusam ani e.

A dang leh ah chuan thazam lam natna neuropathy vang te pawh a ni leh thei ang. Kawngruh lam fel lo te a nei em tih hriat ni ta se. Kawngruh atanga thazam rawn chhuahna kua hi a tawt chuan khami thazam in a supply area ah khan na a awm fo thin a, Sciatica kan tih pawh hi chutiang tho chu a ni. Engpawhnise, in check up chu a tul hle niin a lang a. Fimkhur tak chungin doctor thiam zawk te lo entir thei ula a tha ber ang. Upa lam insawiselna hi chu ngaihthah loh a tha thin.