Zirtawpni (June 5) kha World Environment Day a ni a. WED hi June 5,1972 a UNO buatsaih environment chungchang sawihona pawimawh tak mai 'United Nations Conference on the Human Environment' tih neih tan ni denchhena kumtin hman thin a ni a. Kumin thupuiah hian "Seven Billion Dreams. One Planet. Consume with Care" tih a ni a. Khawvela mihring tluklehdingawn 6 te nun hona atan leh ram hmasawnna atan a tawk chauha khawsak thiam a pawimawh, tihna a ni mai awm e. Prime Minister pawhin a chenna hmunah he ni pual hian thing a phun nghe nghe a. Chanchinbu lama kan hmuh dan chuan khawvel pum huap he ni pawimawh hi Mizoramah chuan khaw pahnihah hman a ni a, Aizawlah hian hman a ni lem loin a lang. Environment han tih hian nunna atan leh khawsakna atana mihring mamawh thil tinreng hi a huam vek awm e. Thing leh mau, nungcha, tui, boruak, lei lung leh a chhunga awm, mihring ni lo, Pathian thilsiam dang tinrengte hi environment chuan a huap vek a ni. Mizoram mipui za zela sawmsarih vel hi leilung leh a kaihhnawih (lo neih, ran vulh, mistiri hna, etc.) hmanga eizawng an ni a, kut hnathawktu kan tihte pawh hi environment nena inhnim hnai reng an ni. Chuti chung chuan, zep thu a cheng lo, environment venhim chungchangah hian Mizote hi kan la harh tawk lo hle a, vei tak te a vei 'environmentalist' tih tur pawh kan la awm lo hial maithei. Tun dinhmuna environment venhim chungchanga kan rilrua lang ber chu ramngaw humhalh, thingphun leh ramkang vente hi a ni thin. Heng hi khawvel pum huap pawha hmalakna pui deuh ber chu a ni hrim hrim a. Mahse, heng bak hi ngaihtuah tel tur leh ngaih pawimawh tur tam tak a awm. Leimin thin te, tui leh boruak bawlhhlawh tial tial te, ri bengchheng nasa lutuk te, bawlhhlawh chungchang te, faina leh thianghlimna lam te, nungcha tlem tial tial te leh a dang tam tak hi ngaihtual tel ngai a ni. Heng zawng zawnga mawhphurtu ber chu mihringte hi kan ni a. Kan eizawnna te, kan nunphung leh nitin khawsakna te, kan ei leh in te hian eng kawng emaw talin min hualveltu (Environment) hi a nghawng zel a - a chhe zawnga nghawng a neih tam chuan a tuartu tur chu keimahni tho kan ni dawn tih kan hriat a tha. Ram hmasawnna hian environment a nghawng tih hi thu chiang a ni a. Juda mithiam America rama cheng, 1971 a Nobel Prize in Economic Sciences dawngtu chuan ram hmasawn chhoh dan a zir chiang a, ngaihdan chiangkuang tak (hypothesis) a siam a, chu chu zirna huangah chuan 'Environmental Kuznets Curve' (EKC) ti a hriat lar a ni a. (inverted U-curve hypothesis pawh an ti bawk). Mipui sum lak luh (per capita) pung zel leh leilung hausakna hmanral (leh bawlhhlawh) pung zel inkungkaih dan zir chianna a ni. A thil hmuhchhuah hi mawlmang te a sawi dawn chuan, chhungkaw sum lak luh a tlem lai chuan eizawnna leh lei lung, thing leh mau a inzawm nasa bik a, sum lak luh a tam zel rualin hengte hi kan hmang ralin kan tichereu nasa a, mahse hmasawnna a kal zel a, sum lak luh a pun zel chuan khua rei deuh hnuah a tichereu tlem tial tial thin. Ram rethei zawkte hian an eizawnna avangin environment humhalh leh venhim an harsat hle a, mahse hma an sawn zel chuan an tichereu tlem tial tial thin. Tuna kan ram dinhmun atang pawh hian hei hi ngaihtuah tham a ni. Ramngaw a chereu nasa a, lui tui a tlem tial tial a, hetih lai hian ruahmanna fel tak nena humhalh a ngai khawp mai. Ram hmasawnna kan tuipui a, tuikhuah te kan buaipui a, kawngpui siam te, in leh lo tha pui pui din te kan uar tan a, thilsiamnate pawh kan din ve tan mek a, khawpuia mihring kan pun zel rualin damdawi in te, bazar te a lo tam zel bawk a. Heng zawng zawngte hi environment-in a tuar tan a, kan fimkhur loh chuan lu chungah meiling kan chhek mek tihna a ni ang. Tunlaiah chuan hmasawnna hnathawh (tuikhuah, kawngpui siam, puipunna hmun din, etc.) ah reng reng hna tan hmain environment a nghawng theih dan zir chian phawt tur a ni a. Chu chu Environmental Impact Assessment (EIA) an ti a (tunhmaa environmental clearance an tih kha), chubakah chuan hmalakna hmuna chengte a nghawng theih dan tur Cultural Impact Assessment (CIA) pawh an ngai pawimawh bawk. Chutianga phalna hmuh hnuah chauh hmalak theih a ni. Kan rama thilsiamna rawn din thenkhat (e.g., Lengte a ISPAT, etc.) hi a tirah chutianga zir chianna mumal tak chu a awm lo maithei, kan fimkhur zel a tha khawp mai. Engpawhnise, heti lamah hian thuneitute an bengvar a tul a, sum leh pai it vang leh hmasawnna buaipui lutuk vanga environment humhalhna lam kan ngaihthah palh a nih chuan nakinah kan buai ang. Hmasawnna kan tuipui pawh hian 'Hmasawnna Tlo' (Sustainable development) chauh hi tui pui tur a ni a. Tunlaiah chuan ramngaw leh nungcha tichereu lo zawnga hmasawnna 'Green development' tih te an sawi uar tawh a. Chumi atan chuan thuneihna sang taka thuam state pollution control board kan neih te leh environment & forest department te hian mawh an phur zual bik awm e. Environment nghawng thei sorkar leh sumdawngte hmalaknate an vil that deuh deuh a ngai. Mi thenkhatin an sawi thin leh an vei em em pakhat bawlhlawh tawih ral thei leh tawih ral thei lo thliar hran a, hman nawn theih chi sawngbawl chungchang tunhnai lawka NITI Aayog adviser leh official lo kalten rawn sawi chhuak ve leh pawh kha bawhzui a hun khawp mai. Tunah hi chuan khawpui bawlhhlawhte hi thliar chuang lo a a vaia Tuirialah paih khawm a, hal ral a ni mai a, tam tak chu kawr remchangah paih a ni a, chungte chu Tlawng leh Tuirialah a luang lut leh thin a ni. Environment venhim leh humhalh chungchang hi Supreme Court pawhin a ngaihtuah tawh a, a thuchhuak angin India rama university zawng zawng enkawltu University Grants Commission pawhin 2004 khan thuchhuah a siam a, chumi ang chuan India ram chhunga university zawng zawngah zirlaiten environmental studies subject an zir vek tawh a ni. Hemi rual tho hian NCERT pawhin class 1 atanga Class 12 thlengin an zirlaiah environment education a telh bawk. Tuna kan ram dinhmunah hi chuan environment humhalh leh venhim chungchang hian ngaihpawimawh a la hlawh tawk lo viau a. Mahse, sorkar, tlawmngai pawl leh mipui pawh heti lama kan than harh erawh a hun tawh khawp mai. Sorkar department thenkhat hmalakna leh pawl anga hmalakna hmuh tur a awm zauh zauh na a tun aia nasa zawk a kan vei a, kan thawh a hun hle tawh a ni.