A hun lai na nâ nâ kha chuan khawvêla mi hausa tawntáw leh thil ti thei tak mai kha a ni pha ve a nia! Ni e, sumdáwng hausa Howard R Hugher Jr. kha thlawhtheihna lam (aviation) thila mi thiam chungchuang leh world record siamtu a nih mai bâkah Hollywood star ni chunga Hollywood “tawih” duh duh chhai thei khawpa luck pawh a ni. Mahse, 1960s–’80s chhoa American zínga mi hausa berin hring nun a hman ral dàn erawh kha chu … a zuih ve ngawt mai—a zuih ral raih zu nia!

Howard R Hughes Jr. khân hman sèn loh sum leh pai chu a nei tehmeuh mai; mahse, “hring nun rohlu”—rilru hah chawlhna leh thlamuanna a nei tlat lo! A hring nun chawhnu lamah phei chuan a rilru a buai a, mi ä ang maia khawsain mipui bihrûksanna tùr hmun zawngin a vâk ruai ruai ta ringawt mai a nih kha!

Hausa tùra piang

Sumdàwnna lama indin nghet chho mék Howard Robard Hughes Sr. fapa, Howard Robard Hughes Jr hi kum 1905, December ni 24-ah Houston, Texas, US-ah a piang a. Kum li mi a nih laiin a pa’n tui­alh-thei (oil) verhna kháwl changkäng (rotary bit) a siam chhuak a; “Hughes Tool Company” dinin an chhúngkaw hausakna tùr bul a tan.

Howard R. Hughes Jr. pawh hi mi tumruh tak leh thluak tha tak mai a ni a, engineering lama mi thiam a ni. California Institute of Technology, Pasadena-a lehkha a zir hnuah Rice Institute of Technology, Houston-ah zir chhunzawmin heta a zir lai, kum 17 mi a nih laiian a nu, Allene Stone Gano chuan a thihsan hlauh. Kum hnih hnu, 1924 January thlaah a pa’n a thihsan zui ve leh bawk.

A pa company din neitu nihna chu a pumbilh ta vek a. A lehkha zir lai chawlhsanin company a enkawl zui. Kum 1934 atanga 1951 chhúng kha chuan a company chu oil lâk chhuah nána lung verhna (rock drill bit) siam chhuaktu lian ber a nih bâkah oil lama sumdáwng hlâwk ber páwl an ni chho a; khawvêla mi hausa berte zínga chhiar tel a ni chho ta hial.

Kum 19 mi a nihin Ella Rice chu nupuiah a nei a. An inneih hnu lawkah lemchan khawvêla hming chher tumin Hollywood lam an pan.

Hollywood lama a changtupa

A tìr chuan Hollywood lamah hian a tla na lëm lo—miten “mi hausa” tia an en hran deuh vàng a ni maithei. A film channa hmasa ber “Everybody's Acting” chu 1927-ah tih chhuah a ni a; a làrpui nghâl hle. A dawttu, “Two Arabian Knights” pawh hlawhtling lehin Academy Award (Best Director of a Comedy Picture) a dawng pha hial. He mi hnua a channa movie eng emaw zât pawh Academy Awards dawng thei tùra chhawp chhuah (nominate) an ni bawk.

Kum 1930-a tih chhuah “Hell's Angels” phei chu ama siam leh tih chhuah niin a hlawhtlinpui hle. He mi hnu pawh hian film eng emaw zât chan chhunzawmin a produce zui bawk.

He tih lai hian Hughes hian a nupui Ella Rice chu Houston-ah amahin a awmtír tawp thìn a; kum 1929-ah an inthen ta hial. Tin, Howard Hughes kha “hmeichhe mi” ve tak nia sawi a ni a. An khatih laia Hollywood nula chhe lo ber ber—Katharine Hepburn, Bette Davis, Billie Dove, Gene Tierney, Ava Gardner te leh and Olivia DeHavilland te pawh lo chhai thlu thei kha a ni ve tlat a …

Thlâwk mi leh Las Vegas cheitu

Naupang të a nih lai atang tawhin Howard Hughes hian thlawhna lam thil a ngaina hle. Pilot a nih piah lamah, mahnia inzir chawpa aircraft engineer a ni bawk. Hetiang lamah hian world record pawh a siam nual. Darkar khata 352 mph-a chaka thlâwk thei thlawhna, “Hughes H-1 Racer” tih hming pu a siam te; July 10, 1938-a ni thum leh darkár 19 (darkár 91) chhúng, thlawhnaa khawvêl a hêl chhuah te kha a record siam tam tak zínga langsàr deuhte an ni.

1960s–’70s chho khán Howard Hughes hian Las Vegas-ah intàwl-lènna hmun, casinos leh hotel eng emaw zât leiin a din bawk a. Chûngte chu, vawiina Las Vegas khawpui cheitu leh nawm-chenna-khawpui nihtírtu, tia sawi an kai hial. Khûng Las Vegas-a hotel lian—The Desert Inn te, The Sands Hotel te, The Castaways, The Frontier Hotel, The Landmark Hotel and Casino, The Silver Slipper te khu, a hotel leh casino lian leh hmingthang zualte an ni.

Hêng bâkah hian Summa Corp., Howard Hughes Corp., Hughes Aircraft Company, Howard Hughes Medical Institute, Hughes Airwest Airlines, te dinin, a neitu a ni vek bawk. Sumah chuan a buai lo ang tih a chiang reng!

Nupui pahnihna

Kum 1947 vêl atanga a lo zui tawh, khatih laia filmstar hriat hlawh, hmel tha leh zei zet, Jean Peters nèn January 12, 1957-ah a rûk të-in an innei a. An inneih hnu hian Jean Peters hian lemchan lam chawlhsan hmakin nun phung tláwm takin a nung zui mai a. Hughes erawh chuan vàntláng hmuh loha a hla thei ang bera awm bo a duh tial tial thung. Hun rei tak chhúng chu an awm hrang nghe nghe. Los Angeles-ah Jean Peters a khawsak laiin Hughes erawh awmna hmun nghet nei loin ama hotel hrang hrangah a khawsa kual thìn. Kum 1971 June thlaah fa pawh nei loin an inthen ta nge nge a ni. An inthen hnu hian Hughes hian Peters-i hi a la duh hle a, sum leh paiah a la tanpui reng niin an sawi. Amah hre chiang­tute sawi dàn phei chuan, Jean Peters hi “a hmeichhe hmangaih awmchhun,” tiin an sawi hial a ni.

A hring nun chawhnu lam

Fa pakhat mah nei lo, pathlawi Howard Hughes hi a kum lam a lo upat deuh hnuah a khawsak phung a mak tual tual a, rilru mumal pu lo leh buai nuaiin a khawsa chho a ni ber. Ei tùr an chhawpsak pawh mi dang a ei hmasaktír phawt loh chuan a ei ngam tlat lo a. A cháng leh a film siamna pindan (studio) thimah, páwn ëng hmu miah loin, chocolate, ar sa leh bawnghnute chauh ringin thla li dáwn dâwnte a inkhung thìn. Kum 1968-a film tih chhuah, “Ice Station Zebra” pawh kha a âtchilh tlat bawk; vawi 150 chuang a en chhuak! Tin, a film siam pakhat, “The Conqueror” hlawhchham chiang lutuk mai pawh kha pawi a tiin a inthiam thei lo a. A film copy an zawrh chu copy khat dollar mtd. 12 zêlin, copy eng emaw zât a lei hial!

Thlawhnaah vawi duai lo a che sual a, tara lamah taksa ná leh rilru dam lo rêng rêngin hun a hmang ral a ni ber. Damdawi ruih theih “codein” (khuh damdawi) ngawl veiin, ni khatah vawi duai lo a inchiau thìn. A nazawnga lu meh leh tin hleh a duh lo a; kum khatah tum khat emaw a mêtin a hlep duh tâwk chauh thìn. A zun búrte hial a kháwl ruih zêl!

Putar hausa Hughes chu a thuihrual mi eng emaw zâtin an véng reng a. Beverly Hills, Boston, Las Vegas, Nassau, Freeport leh Vancouver-a ama hotel hrang hrangah a riak kual thîn a. Mipui tam takin a thi tawh emaw an ti hman hial!

Kum 1976, April ni 5-ah Acapulco, Mexico-a ama in të atangin mi mal jet, “Learjet 24B N855W”-in Methodist Hospital, Houston panin an thlâwk chhuak a. Chawhnu dár 1:27-ah an che sual a, Hughes chu damdawi in panpui a nih laiin a thi ta a ni.

A tìr chuan amah Howard R Hughes Jr. a ni tih an hre lawk lo a; feet ruk leh inchees li-a sáng ni si chu kg 41 chauha rit a lo ni tawh a. A lu, a khabe hmul, a kut leh ke tinte chu an bukin an sei êm êm bawk a. FBI lamin an en dik hnuah a kutzia (fingerprints) atangin Howard Hughes Jr. a ni ngei tih an finfiah thei chauh a ni.

Thla muangin a thi si lo a…

Hlauh leh vei leh vèn thàwn nei miah loa thlamuang taka awm veng veng theihna te, han hahchawlh veng veng theih­nate hi sum leh paia lei theih chu ni se, aerospace engineer leh sumdawng hausa tawntáw Howard Hughes khân a lei ngei ang. Mahse, a hun tàwp lam chu mipui laka bihrûk nán a hmang ral a; sumin a lei theih loh thlamuanna nei loin a hring nun chawhnu hun a hmang ral a—ani lo liama mi khawngaihthlâk! A chatuan kalna tùr nèna ngaihtuah phei chuan ti raw…?