Zawhna: ZALEN chhuak hmasaa Heart Attack hi zân mut that loh vanga awm thei i rawn ti si a, ka tan chuan a hlauhawm theih ngei ka ring. Mipa kum 50 ka ni a, zânah hian ka mu tlem thei em em mai a, darkar 2/3 lek te mut chang ka nei, chu pawh khawvar dawn lam hnaihah. Mut theih loh na na na chuan thil ka ngaihtuah vak vak zui a, hei vang zawk nge pawh ka hrethiam lo. Zunthlum ka nei lova, vawikhat BP sang ve zawk tih loh chu harsatna dang vak ka nei lo. Mut tam theih beiseiin Sleeping pills lampang ka ei leh ngawt thin a, hei pawh hian min pui meuh lo. Ei fo hi a that ka ring bawk si lova, min puih theih chuan ka lawm ngawt ang. 

Chhanna: Heart attack hi kan lo tarlan tawh angin chhan hrang hrang vangin a awm thei a, derthawng bik te pawh an awm bawk. Chung zingah chuan stress nei sang te hi an derthawng duh deuh bik niin an sawi. Taksa rit lutuk te, zunthlum nei te, thisen sang nei te hi an derthawng zual bik bawk. Chutih rualin taksa tih hah lutuk te hi a hlauhawm thei; entirna pakhat ah chuan gym a exercise la nasa lutuk emaw infiamna lama taksa tlin bak ti nasa thin te hi an derthawng duh viau mai. Zuk leh hmuam ti nasa te, rit/thau kher lo mahse taksa che tlem lutuk te pawh hi an derthawng tho. Zu in nasa te hi an lung a vung duh a (cardiomegaly an ti), chutiang chuan heart attack hi a thlen fo bawk.

I zawhna ah hian lo lut dawn ta ila. Stress sâng kan tih hian taksa emaw rilru hah, taksa hahchawlhna hun nei mumal lo, zân mu tlem te thleng hian a huam thei ang. Kan taksa khawl hi chawlh hun mamawh a ni a, kan taksa mamawh zat mut theih hi hahchawlh nan a pawimawh hle a ni. Zan mut tlem chuan ngaihtuahna fim neih pawh a har duh hle a, mood a chhe hma a, dawhtheihna tlakchham pawh a awl hle. Chung te chuan stress level kha a ti sang zual sauh thei bawk. In lama harsatna chinfel theih si loh neih reng te, nupa kara inhriatthiam lohna awm reng te, fate vanga rilru hahna te hi stress ti sang zualtu an ni duh hle.

Mithiamte sawi dan chuan kan taksa hian darkar 7-8 emaw tal hi mut hun a mamawh an ti a. Kum a lo tam tial tial hian mut hun chhung a rei lo ve tial tial duh viau bawk. Darkar 4-5 lek mu \hin, an hnathawh buai ngai lo, insawiselna nei hran lo hi an awm fo a, chutiang zawnga thlir chuan mihring a zirin mut hun chhung mamawh zat hi a danglam a mai lo maw a tih theih awm e. Mahse mithiamte bawk hian an sawi dan chuan darkar 7 vel tal kan mut loh chuan kan taksa in hna a thawh \hat theih dan hi a tlahniam hret hret an ti a ni.

Mihring hi kan in ang lo khawp mai a, zan lam mu tlem, chhun lam hna emaw mawhphurhna buai lem lo te pawh hi an awm fo mai. Mahse a lo rei tial tial chuan taksa khan a lo tuar thei a ni tih a lang a. Mut that loh chuan stress level a ti sang a, chu chuan heart attack pawh a thlen hma thei ani (a ni vek kher lo thei a). Competitive sports level sang ah te phei chuan mut tam/mut that hi an dah pawimawh hle. Mu tam mahse harh vek vawk thei lo hi a awm theih leh bawk a, an mut chhunah quality sleep an nei thei lo ani fo thin.

I mut that theih loh hian chhan a neih ngei chu a rinawm. Sleep disorder hi rilru lam fel lohna chi khat ni a ngaih a ni a. Rilru natna (mental illness) nen pawh a inkaihhnawih thuk viau mai. Eng ang chiahin nge medical check-up i neih i sawi lova, zunthlum i nei lova, thisen sang erawh i nei zeuh tawh tih i sawi thung a, a hnu lamah a sang chhunzawm lo anih hmel a (i sawi dan atangin). Chuti chung chuan fel lohna eng emaw i nei ani thei ang em? Ruihtheih thil lam i tih leh tih loh i sawi lova, i ti lo turah ngai ta ila. Mahni thu in sleeping pills hi i ei mai thin nge ni? Hei hi a fel lo ang reng a. Sleeping pills hi mahni thua ei mai chi a ni lova, ei dan te leh ei zat tur bituk a ngai a, doctor prescription nei lova ei mai hian hmansual (abuse) a awm hle a ni. Chuvangin mumal taka check-up chu i mamawh niin a lang.

Tunlai khawvel digital world ah hian kan mit hian visual stimulation an tih mai, min ti harh thei thil, kan ngaihtuahna luah lian thei min chhawp reng a. TV emaw computer emaw phone te hi hriat loh karah addict a awl hle. Heng visual stimulation te hi tih nasat lutuk chuan kan taksaa mut chhuahna lo thlentu khawl hnathawh a ti buai thui thei hle. Zan mut hunbi insiam a, chumi a thlen hma darkar khat tal phone emaw TV en lova awm theih te hian mut theih kawngah a pui fo a. Mut dawna lehkhabu chhiar zawk te hi a tha fo bawk. Sleep therapy an tih mai, damdawi hmang silova mut tih chhuah dan te pawh internet lamah lo en ta la. Engpawhnise, doctor, a bikin Psychiatrist te lo inentir thei la chu a tha ber awm e.